Կոտայքի մարզպետարանի բիզնես-մտածողությունը՝ Գառնիի ծննդատանը

Վերջին շրջանում Կոտայքի մարզպետարանի Առողջապահության և սոցիալական ապահովության վարչության պետ Վահագն Ոսկանյանը հաճախ է գնում Գառնի համայնք, պատճառը Գառնիի համայնքում գտնվող հիվանդանոցն է:

Newspress.am-ի աղբյուրը տեղեկացրեց, որ Վահագն Ոսկանյանի նպատակը հիվանդանոցի հաստիքների կրճատումն է: Նշեց նաև, որ արդեն մեկ տարի է` խոսակցություններ են պտտվում, որ հիվանդանոցը ցանկանում են վերածել հյուրանոցի, իսկ թե որտեղ են բուժօգնություն ստանալու ոչ միայն Գառնի, այլև հարակից Ողջաբերդ, Հացավան, Գողթ, Գեղադիր, Գեղարդ համայքների բնակիչները, այդ մասին Կոտայքի մարզպետարանից ցուցումներ չկան:

Սակայն, ինչպես վստահեցրեց աղբյուրը, ցուցումներ են տրվել հիվանդանոցի տնօրենին՝ աշխատակիցների կրճատման համար, մասնավորապես նախատեսում են կրճատել ծննդատան աշխատակիցներից 3-ին` թողնելով միայն մեկին, նա էլ պետք է աշխատի առավոտյան ժամը 9-ից մինչև 4-ը, իսկ թե, օրինակ, ժամը 5-ին ծննդաբերող կինը ում պետք է դիմի, այս հարցը ևս Վահագն Ոսկանյանը չի քննարկել:

Նշենք, որ հաճախ է պատահել, որ Գառնիի հիվանդանոցի աշխատակիցները ծնունդ ընդունելու համար մեկնել են հարևան Հացավան համայնք, որտեղ ծանր վիճակ է ստեղծվել և տեղում ընդունել ծնունդը:

Պատահել է նաև, որ ամռան շրջանում Գառնիի սարերում ամառային արոտի մեկնած ազգությամբ եզդի բնակչությանը անհրաժեշտ է եղել մանկաբարձական ծառայություններ. հիվանդանոցի աշխատակիցները տասնյակ կմ են անցել և ցուցաբերել համապատասխան օգնություն:
Իսկ թե նման դեպքերում ինչպես պետք է վարվել, կամ թե արդյոք Կոտայքի մարզպետարանի համապատասխան աշխատակիցներն են մեկնելու օգնեն բուժօգնության կարոտ բնակչությանը, այս հարցը ևս Վահագն Ոսկանյանի կողմից չի քննարկվել:

Հակառակը` նախօրեին, երբ գալով հիվանդանոց՝ քննարկելու կրճատումների հարցերը, Վահագն Ոսկանյանը հանդիպել է հիվանդանոցի մուտքի մոտ բողոքող Գառնիի բնակչությանը: Ականատեսները վկայում են, որ ավելի շատ մարդ էր հավաքվել հիվանդանոցի մոտ, քան Ազատ գետի փրկելու հարցով բողոքի ակցիայի ժամանակ:

Տեսնելով հավաքվածներին` Վահագն Ոսկանյանը չքմեղացել է և հավաստիացրել է, որ այն ամենն ինչ գառնեցիներն ասում են՝ թե հիվանդանոցը փակելու, թե կրճատելու վերաբերյալ սուտ է, իսկ թե այդ դեպքում ինչու է եկել նա հիվանդանոց, այս հարցը ևս չի քննարկվել:
Ի դեպ գառնեցիները բարձրացրել են դեղորայքի, շտապ օգնույթան ծառայության, նաև աշխատավարձերի հարցը, երբ անգամ նվազագույն աշխատավարձ չեն ստանում, այլ 40-45 հազար, Վ. Ոսկանյանը հեգնել է՝ դա կարևոր չի, նաև նշել է, որ 20 մլն դրամի վերանորոգման աշխատանքներ են արվել հիվանդանոցում և չեն փակելու, ինչին ի պատասխան հավաքվածներն ասել են, որ հիվանդանոցի վրա առնվազն 5 մլն դրամի աշխատանք է արվել, որին ևս Վահագն Ոսկանյանը պատասխան չի ունեցել:

Ինչպես երևում է՝ ՀՀ վարչապետ Հովիկ Աբրահամյանի առաջարկած գերատեսչական կրճատումներին Կոտայքի մարզպետարանում լրիվ լուրջ են ընդունել, բայց ոչ իրենց մասով: