Պետք է նուրբ վերաբերվենք այս հարցին. Թևան Պողոսյան

«Կան իրադարձություններ, որոնք մենք չենք կարող գնահատել այսօր: Ես կարծում եմ, որ սա հերթական երկրի հարց չէ, քանի որ երբևիցե մենք նման երկրի ճանաչում չենք ունեցել: 100 տարի անց Հայոց ցեղասապանության մեղավորներից մեկն ընդունեց իր մեղքը: «Կապ չունի թե որքան մարդ կզոհվի, կարևորը Թուրքիան մեր կողքին լինի». ուղիղ հարյուր տարի այս կարգախոսով է շարժվել Գերմանիան և այսօր ընդունել է ցեղասպանության իրողությունը: Հայոց ցեղասպանությունն այլևս աքսիոմատիկ ճշմարտություն է Եվրոպայի համար»: «Անդրադարձ» մամուլի ակումբում ցեղասպանութան թանգարանի փոխտնօրեն Սուրեն Մանուկյանը խոսեց Գերմանիայի Բունդեսթագի կողմից Հայոց ցեղասպանության ճանաչման փաստի մասին:

Սուրեն Մանուկյանի կարծիքով` Էրդողանի միակ կայուն հատկանիշը նրա անկանխատեսելիությունն է, և այս քայլն Էրդողանի անձի դիրքերը թուլացնելու համար էր, ինչու ոչ նաև այլ քաղաքական գործիչներին հարթակ բերելու:

Գերմանիայի կողմից Հայոց ցեղասապանության ճանաչման մասին խոսելիս ԱԺ պատգամավոր Թևան Պողոսյանը նկատեց , որ, իհարկե, հայ-գերմանական հարաբերությունների հերթական դրական էջը բացվեց , սակայն այսօրվա դրությամբ Գերմանիան գլխավորում է ԵԱՀԿ-ն:
«Պետք է շատ նրբորեն մոտենալ այդ հարցին` չմոռանալով, որ ցանկացած դրականն իր բացասական կողմն ունի և կարող է ունենալ իր հետևանքները»:

Թևան Պողոսյանի խոսքով` բանաձևը հետաքրքիր է այնքանով, որ Գերմանիան այդ փաստաթղթով ընդունում է իր նախնիների մեղքը, միևնույն ժամանակ այդ փաստը ներառելով նաև իր երկրի կրթական ծրագրում ճանաչելի է դարձնում իր սերնդի համար:

Թե ինչպես կձևավորվեն թուրք- գերմանական հարաբերությունները, պատգամավորն ասաց, որ արդեն առաջին քայլն արվել է՝ Թուրքիայի դեսպանին հետ են կանչել իր երկիր, սակայն պետք է հաշվի առնել, որ դա ժամանակավոր է, քանի որ այս պահի դրությամբ գերմանական շուկան Թուրքիային ավելի է հարկավոր, քան հակառակը: Հարցազրույցի ժամանակ երկու բանախոսներն էլ նկատեցին, որ այլևս Թուրքիայի համար ժխտողականությունը ավելի մեծ խնդիրներ կառաջացնի, քան ընդունումը: