Գյուղնախարարության նկարչական հմայքը

Վերջին շրջանում շատ է խոսվում պետական ապարատից կրճատումներ անելու մասին, տրվել են հանձնարարականեր: Ըստ «Առավոտ» թերթի տեղեկությունների` գյուղնախարար Սերգո Կարապետյանն  առաջինն է կրճատումների ցուցակով շտապել վարչապետի մոտ:
Նշենք, որ ըստ օդից կախված լուրերի, Սերգո Կարապետյանի հետ դժվար են աշխատում նախարարության աշխատակիցները, նախ այս տարիներին մեծ թվով աշխատողները դուրս եկան գյուղնախարարությունից, ովքեր երկար տարիներ համակարգում էին: Խոսում էին, որ անգամ հրապարակված թվերն ու փաստերն էր նախարարը հրահանգում քողարկել, իսկ աշխատակիցների մի մասը պարտավոր է գեղեցիկ նկարված գյուղատնտեսական զարգացման տվյալներ ներկայացնել:

Այսինքն` նման նկարչություն անելու համար Գյուղնախարարության մեծ անձնակազմ պետք էլ չէ: Բացի այդ, նկարված տվյալները մատուցվում է Հանրային հեռուստաընկերության եթերով, որից հետ չի մնում Սննդի անվտանգության պետական ծառայությունը. այս կառույցը ևս լինելով Գյուղնախարարության կազմում` արդեն տևական ժամանակ է` սննդի անվտանգության, որակի, և ընդհանրապես իր պարտականությունները կատարելու փոխարեն, մեծամասամբ զբաղված է Փի Ար ապահովելով՝ այս անգամ դարձյալ Հանրային հեռուստաընկերության եթերով. նմանակելով ռուսական ալիքի հաղորդումը, որտեղ տարբեր ընկերությունների սննդատեսակները ճաշակելով, սպառողներն իրենց կարծիքն են արտահայտում որակի վերաբերյալ: Նմանակել կարելի է, սակայն նմանակել և ծիծաղեցնել միաժամանակ ռուսական ալիքին հաստատ չի հաջողվում:

Այնպես որ Գյուղնախարարությունը նկարչատան է վերածվել, քանի որ անգամ չի կարողանում ժամանակին հավաքագրել մթերումների գումարները՝ հենց գյուղացիների համար, չի կարողանում համակարգել արտահանումները, բանջարաբոստանային հավասարակշռությունը, փոխհատուցումներին, պաշտպանել ի վերջո հողմշակների շահերը:

Սակայն, երբ խոսքը վերաբերում է աճերին, արտահանումներին, հողատարածքների ավելացմանը, Գյուղնախարարությունը կախարդական փայտիկն է գործի դնում:

Նախարարությանը մնում է միջազգային կառույցների կողմից գումարներ ներգրավելը, անհասկանալի ծախսելը, սակայն պատշաճ Փի Ար ապահովելը: Կառույցը հողմշակներին պետք չէ, արձանագրել գյուղոլորտում իրավիճակն Ազգային վիճակագրական ծառայությունն անում է, դոնոր կառույցներից գումարներ ներգրավելը ֆիննախը կանի, իսկ գյուղնախի անսահասկանալի ծախսերի բացակայությանը հանրությունը հերոսաբար կդիմանա, մնաց այպես ասած նկարչությունը, որտեղ նախարարությունը լուրջ ձեռքբերումներ ունի, ահա այս մասով հնարավոր է փորձի փոխանակում կատարի գյուղնախը, կամ էլ վարպետաց դասեր կազմակերպի նորելուկների համար: Այնպես որ` այս անգամ Սերգո Կարապետյանը միանգամայն ճիշտ է, որ կրճատում է Գյուղնախարարությունից. երկու հոգի գրեն, երկուսը՝ նկարեն, մեկն արտասանի՝ ավելի քան բավական է Գյուղատնտեսության նախարարության համար: