ԵԿՄ-ի ամառային ճամբարում երեխաները կզուգորդեն հանգիստն ու դասընթացները. մեկնարկը տրված է

Եռասերունդ Երկրապահ կամավորականների միությունն առանձնահատուկ ուշադրություն է դարձնում պատանի և երիտասարդ երկրապահների ռազմահայրենասիրական դաստիարակությանը: Սպարապետ Վազգեն Սարգսյանի պատգամն է` հայ երեխան դպրոցից պետք է իմանա, թե ինքն ով է, որտեղից է գալիս և ուր է գնում: Պատգամը կյանքի է կոչում Սպարապետի իրավահաջորդ Զորավար Մանվել Գրիգորյանը:

Երկրապահների պատանեկան կառույցն ստեղծվել է դեռ 1997 թվականին, սակայն, 2014-ի սեպտեմբերի 9-ից, երբ եռակողմ հուշագիր ստորագրվեց Երկրապահի, պաշտպանության և կրթության և գիտության նախարարությունների միջև,  աշխատանքներին նոր որակ հաղորդվեց: Այսօր արդեն «Պատանի երկրապահ» հայրենասիրական ակումբներ գործում են Հանրապետության բոլոր դպրոցներում:

Երկրապահը գործակցության հուշագրեր է ստորագրել նաև արտակարգ իրավիճակների, առողջապահության, աշխատանքի և սոցիալական հարցերի, սպորտի և երիտասարդության հարցերի, արդարադատության, սփյուռքի նախարարությունների, փաստաբանների պալատի, պետական կադաստրի կոմիտեի, անվտանգության միջազգային ակադեմիայի հետ: Նշված կառույցների, նաև` ոստիկանության մասնագետների և հայ առաքելական սուրբ եկեղեցու սպասավորների մասնակցությամբ, Երկրապահը կազմակերպում է հրամանատարասերժանտական դասընթացներ, որոնց մասնակցող երեխաները շարային, կրակային պատրաստություն են անցնում, սովորում են կողմնորոշվել արտակարգ իրավիճակներում, ցուցաբերել առաջին բուժօգնություն, հաղորդակցվում են հայոց պատմությանը, հայ եկեղեցու պատմությանը: Եվ յուրաքանչյուր դասընթաց վարում են տվյալ ոլորտի որակյալ մասնագետներ, ովքեր նույնպես կամավորական են:

Պատանիների հետ տարվող աշխատանքների կարևորագույն փուլերից են ուսումնամարզական վարժանքներն ամառային ճամբարում: Այստեղ երեխաները  զուգորդում են հանգիստն ու դասընթացները:

Ճամբարն այս տարի ներկայանում է արդեն կատարելագործված տեսքով` տարածքը գազիֆիկացվել է, էլեկտրիֆիկացվել, նոր ընդարձակ ճաշարան է կառուցվել, տեղադրվել ու կահավորվել են տնակներ, սանկոյուղու, լոգարանների համար ևս առավել բարենպաստ պայմաններ են ստեղծվել:

2016-ի ճամբարային սեզոնի բացման հանդիսավոր արարողությունը կազմակերպվեց հունիսի 1-ին` երեխաների պաշտպանության միջազգային օրը:

Ճամբարային սեզոնի բացման և երեխաների պաշտպանության միջազգային օրվա կապակցությամբ ԵԿՄ վարչության նախագահի շնորհավորական ուղերձն ընթերցեց վարչության փոխնախագահ Խաչիկ Մկրտչյանը:

Ճամբարի բացման կապակցությամբ ողջույնի խոսքերով հանդես եկան Երկրապահի երեք սերունդների և գործընկեր կառույցների ներկայացուցիչներ:

Ճամբարի բացման արարողության ժամանակ նոր մի ավանդույթի հիմքը նույնպես դրվեց: Երկրապահի ղեկավարի հրամանով հստակ տարիքային ցենզեր են սահմանվել պատանի և երիտասարդ երկրապահների համար: Ըստ այդմ` 16 տարին լրացած պատանի երկրապահներն արդեն համալրում են Երկրապահի երիտասարդական կառույցի շարքերը:

Պատանի երկրապահի դպրոցն անցած և այսօր արդեն «Երիտասարդ երկրապահ»-ին անդամագրվածներից մի քանիսն իրենց վկայականներն ստացան հենց այս արարողության ժամանակ:

Ճամբարի բացման առիթով համերգային ծրագիր ներկայացրին Էրեբունու «Պատանի երկրապահ» կառույցի փողային և ժողգործիքների նվագախմբերը:

Ճամբարականների առօրյան գերհագեցած է: Պարապմունքներ, դասընթացներ տարբեր ուղղություններով` շախմատ, սպորտային պարապմունքներ, դասախոսություններ, արտակարգ իրավիճակների, ոստիկանության մասնագետների համապատասխան դասընթացներ…

Հագեցած է նաև պատանի երկրապահների երեկոյան ծրագիրը` մշակութային ծրագիր խարույկի շուրջ և կինոդիտում: