Ձերբակալությունները ռազմական և քաղաքական փոփոխություններ չեն ենթադրում

Քառօրյա պատերազմից հետո, ՀՀ ՊՆ-ում աշխատանքից ազատեցին միանգամից մի քանի պաշտոնյաների: Նրանց պաշտոնանկության հարցում որոշիչ դերակատարություն ունեցավ ՀՀ նախագահի վերահսկողական ծառայության կողմից ՀՀ ՊՆ-ում անցկացված ստուգման արդյունքները:

Սակայն սա դեռ ամենը չէ: Երեկ մայիսի 30-ին հայտնի դարձավ որ ՀՀ քննչական կոմիտեի զինվորական քննչական գլխավոր վարչության ՀԿԳ քննության վարչության վարույթում քննվող քրեական գործերի շրջանակներում ձերբակալվել է 3 անձ` գեներալ-մայոր Մելսիկ Չիլինգարյանը, գնդապետներ Արմեն Մարգարյանը և Մհեր Պապյանը։

Քաղտեխնոլոգ Արմեն Բադալյանի կարծիքով ՊՆ-ում հնարավոր է լինեն մարդիկ, ովքեր կհամալրեն ձերբակալվածների շարքերը, սակայն նրա կարծիքով դա որև է ռազմական և քաղաքական փոփոխություններ չի ենթադրում, պարզապես պաշտոնանկ եղած նախկին պաշտոնյաներին փոխարինելու կգան նորերը:

Հարցին, թե ինչու ձերբակալման դեպքեր եղան, եթե ասվում էր, որ չի լինելու, Արմեն Բադալյանը ասաց. «Զարմանալու կարիք չկա, քանի որ մեր իշխանությունների քաղաքականությունն այդպիսին է, հատկապես վերջին 7 տարվա ընթացքում նրանք միշտ հայտարարել են մի բան, սակայն արել ուրիշ բան»:

Քաղտեխնոլոգը նկատեց նաև որ Կառավարության որոշումները հաճախ են «օդում» մնում ինչպես օրինակ ատոմակայանի կառուցումը, Երևան-Ստեփանակերտ օդային չվերթը և այլն:

Հիշեցնենք, որ ՀՀ ԶՈւ սպառազինության վարչության նախկին պետ, գեներալ-մայոր Մելսիկ Չիլինգարյանը, ԶՈւ սպառազինության վարչության ավտոծառայության նախկին պետ, գնդապետ Արմեն Մարգարյանը կասկածվում են ՀՀ քրեական օրենսգրքի 375-րդ հոդվածի 2-րդ մասով նախատեսված արարք կատարելու, այն է՝ իշխանությունը չարաշահելու, իշխանազանցության կամ անգործության մեջ, որն առաջացրել է ծանր հետևանքներ։ Մեկ այլ քրեական գործով ՀՀ ՊՆ նյութատեխնիկական ապահովման դեպարտամենտի քիմիական, ինժեներական և հետախուզական միջոցներով ապահովման բաժնի պետ, գնդապետ Մհեր Պապյանը կասկածվում է ՀՀ քրեական օրենսգրքի 376-րդ հոդվածի 2-րդ մասով նախատեսված արարք կատարելու՝ ծառայության նկատմամբ անփույթ վերաբերմունք դրսևորելու մեջ, որն առաջացրել է ծանր հետևանքներ: Նախաքննությունը շարունակվում է։