Վարչապետը ոչ կարող է իր դեմ պայքարել, ոչ պաշտոնյաների կանանց

Անկախությունից հետո՝ անկախություն կառուցելուն զուգահեռ սկսեցինք պայքարել կոռուպցիայի դեմ, սակայն յուրօրինակ, քաղաքակիրթ աշխարհին ոչ հասկանալի ձևերով:

Նախ կոռուպցիայի դեմ պայքարում էին փայտերով, հետո սրերով, հիմա արդեն որոշումներով: Դեևս 2015թ-ին ստեղծվել է Կոռուպցիայի դեմ պայքարող խորհուրդ` ՀՀ վարաչպետ Հովիկ Աբրահամյանի գլխավորությամբ:

Որպես բարձրաստիճան պաշտոնյա Հովիկ Աբրահամյանը հայտարարագրել է իր ունեցվածքը: 2015 թվականին Հովիկ Աբրահամյանի դրամական միջոցները կազմել են 180 մլն դրամ և 1 մլն 600.000 ԱՄՆ դոլար, կնոջ՝ Ջուլիետա Աբրահամյանի միջոցները՝ 220 մլն ՀՀ դրամ և 2 մլն 700.000 ԱՄՆ դոլար: Զույգը չի նշել փոխառության տրված գումար:

Թեև վարչապետը հայտնել է, որ իր ունեցվածքը հիմնականում դիզել է գյուղատնտեսությամբ զբաղվելով, այն դեպքում, երբ երկրի բնակչության 20 տոկոսը զբաղվում է գյուղատնտեսությամբ, սակայն կքել է պարտքերի, վարկերի տակ և մատնված է աղքատության:

Վարչապետի գյուղոլորտով զբաղվելը որպես հարստության աղբյուր, մեղմ ասած, հավատ չի ներշնչում:

Չհիմնավորված հարստություն կուտակած անհատը, այս դեպքում՝ վարչապետը, պետք է պայքարի կոռուպցիայի դեմ: Եվրոպացի փորձագետների համար նման իրավիճակը պարզապես անհասկանալի է:

Չհիմանվորված հարստություն կուտակած անհատը պետք է իր ուշադրության կենտրոնում պահի ՀՀ վարչապետի խորհրդական Կովալենկո Շահգալդյանին, ով 2015 թվականին փոխառության է տվել 80 մլն ՀՀ դրամ, իսկ կնոջ՝ Գայանե Շահգալդյանի հայտարարագրում նշվում է, որ 2015 թվականին բազմաբնակարան բնակելի շենքում ձեռք է բերել երկու բնակարան՝ 33 և 48 մլն ՀՀ դրամով, ինչպես նաև հողամաս՝ 9 մլն դրամ արժեքով: Նույն տարում օտարել են բնակարան՝ 85 մլն դրամով: Կովալենկո Շահգալդյանի կինը բնամթերքի տեսքով խոշոր նվիրատվություն է ստացել՝ անհայտ աղբյուրներից՝ ընդհանուր առմամբ 90 մլն ՀՀ դրամի չափով:

Վարչապետը պետք է իր ուշադրության կենտրոնում պահի ՀՀ տրանսպորտի և կապի նախարար Գագիկ Բեգլարյանին, ի դեպ ում կինը՝ Նունե Նիկոլյանը 2015 թվականին հայտարարագրել է 3 մլն 70.000 ԱՄՆ դոլար և 39 մլն 200.000 դրամ գումար: Վարձակալության դիմաց ստացված վճարը կազմել է ավելի քան 47 մլն ՀՀ դրամ:

Նա պետք է իր ուշադրության կենտրոնում պահի ՀՀ կառավարությանն առընթեր Պետական եկամուտների կոմիտեի նախագահ Հովհաննես Հովսեփյանին, ով 2016 թվականի՝ հայտարարագրում նշել է, որ փոխառության է տվել 2 մլն ԱՄՆ դոլար: Նա հայտարարագրել է 6 բնակարան, 6 տարբեր հասցեներում գտնվող հողամաս, թանկարժեք նկարների հավաքածու, շուրջ 2 մլն ԱՄՆ դոլար և 185 մլն դրամ, և այս ամենն այն դեպքում, երբ պաշտոնյան աշխատանքի դիմաց ստացել է ընդամենը 1.781.734 ՀՀ դրամ աշխատավարձ:

Վարչապետի ուշադրության կենտրոնում պետք է լինի ՀՀ կենտրոնական բանկի նախագահ Արթուր Ջավադյանը, ում դրամական միջոցները կազմում են 121 մլն դրամ, շուրջ կես միլիոն դոլար և 151.000 եվրո:

2014 թվականի հայտարարագրում տրված փոխառությունների դիմաց ստացել է 3 մլն դրամ և շուրջ 36.000 ԱՄՆ դոլար տոկոս:
Ջավադյանի ընտանիքի անդամներն էլ՝ դուստրը՝ Աննա Ջավադյանը, և կինը՝ Հասմիկ Մանուկյանը, լուրջ միջոցներ ունեն կուտակած և տրված փոխառությունների դիմաց բավականին մեծ եկամուտ են ստանում:

Հասմիկ Մանուկյանը 2015 թվականին մոտ 30 մլն դրամ և ավելի քան 10.000 դոլար տոկոս է ստացել: ԿԲ նախագահի տիկնոջ դրամական միջոցները կազմում են 51 մլն դրամ, 280.000 եվրո և 560.000 ԱՄՆ դոլար:

Այս պաշտոնյաներից հետ չի մնում ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանը, ում փոխառության գումարը հարկային տարվա սկզբում կազմել է 110.000 ԱՄՆ դոլար: Տրված փոխառություններից 2015 թվականին ստացված տոկոսը կազմել է 8300 ԱՄՆ դոլար: Ռոբերտ Նազարյանի կինը՝ Սվետլաննա Խառատյանն, իր հերթին, տրված փոխառության դիմաց ստացել է 24.450 ԱՄՆ դոլար գումար:

Վարչապետի պայքարը բավականին բարդ է: Նա պետք է ուշադիր լինի ոչ միայն անհասկանալիորեն հարստացած ամուսինների, այլև նրանց հիմնականում գործազուրկ կանանց ու զավակների ֆինանսական հոսքերի նկատմամբ: Այնպես որ կոռուպցիոն պայքարը հենց սկզբից դատապարտված է. վարչապետը ոչ կարող է իր դեմ պայքարել, ոչ էլ ՀՀ պաշտոնյաների ու նրանց կանանց: