Ադրբեջանում միջոցառումներ անցկացնելով՝ միջազգային հանրությունը թև է տալիս ագրեսորին. Դավիթ Բաբայան

Իրավիճակը սահմանին նորմալ է, իհարկե ամեն ինչ համեմատության մեջ: Այս մասին լրագրողների հետ զրույցում ասաց ԼՂՀ նախագահի մամուլի խոսնակ Դավիթ Բաբայանը:

Ինչ վերաբերում է Ադրբեջանում անցկացվող միջազգային միջոցառումներին՝ նա ասաց, որ այդպիսի միջոցառումների կազմակերպումը խայտառակություն է և բազմիցս հայտարարվել է, որ այսպիսի քաղաքականությամբ միջազգային հանրությունը և մի շարք քաղաքակիրթ պետություններ փաստորեն թև են տալիս ագրեսորին:

«Մի պետություն, որտեղ փակվում է «Ազատություն» ռադիոկայանը, ԵԱՀԿ գրասենյակը, որտեղ մարդասպանին, ով կացնահարել է քնած հայ սպային Բուդապեշտում, տալիս են ազգային հերոսի կոչում, որտեղ ազգային հերոս են դառնում այն մարդիկ, ովքեր խոշտանգում են դիակներ, տարեցների գլուխը կտրած ցույց են տալիս, այնտեղ անց են կացնում առաջին համաեվրոպական խաղերը, ՄԱԿ-ի քաղաքակրթությունների ֆորումը, սա պարզապես խայտառակություն է, ուրիշ ոչինչ: Նա էլ թև է ստանում, սկսում է ագրեսիվ քաղաքականություն վարել»,-ասաց նա:

Ըստ Դավիթ Բաբայանի, այդ միջոցառումների անցկացման ընթացքում Ադրբեջանն իրեն զուսպ է պահում, հետո դժվար է լինում նրան զսպել և այս քառօրյա պատերազմը նաև նման քաղաքականության հետևանք է:

«Ավելին՝ որոշ պետությունների ներկայացուցիչներ հայտարարում են, թե Ադրբեջանը հանդուրժողականության, քաղաքակրթությունների բնօրրան է։ Մենք դեմ ենք, որ միջազգային հանրությունը նման քայլ կատարի: Դա ինչ-որ ձևով լակմուսի թուղթ է: Ովքեր սատարում են ահաբեկիչներին, մի օր այդ ահաբեկիչները գնալու են իրենց տուն»,-ասաց Դավիթ Բաբայանը: