Մեզ հետաքրքիր չեն սահմանին սելֆի անող զորավարները

Հայ ժողովուրդը պետք է իմանա այն զորահրամանատարներին և զինվորներին, ովքեր դաժան կռվում հաղթանակ ապահովեցին, ու նաև այն գեներալներին, ովքեր ձախողել են:

Այս մասին newspress.am-ի հետ զրույցում ասաց քաղաքագետ Լևոն Շիրինյանը:

Նրա դիտարկմամբ՝ երկիրը շատ արագ ռեֆորմի պետք է ենթարկվի:

«Էդ պաշտոնական հիերարխիայի շրջանակներում հսկայական փոփոխություններ պետք է լինեն՝ զինվորից մինչև պաշտպանության նախարարություն: Սա իսկական բանակային պատերազմ է, բայց Հայաստանում դա չեն տեսնում: Ո՛չ ձախողվածներին են տեսնում, ո՛չ էլ նրանց, ովքեր բանակի հաշվին ճարպակալել են»,-ասում է Շիրինյանը:

Նա նկատում է, որ թեև ժողովուրդը գիտի, թե ովքեր են զբաղվում բանակի և պետության կողոպուտով, սակայն ԱԱԾ-ն պետք է ներկայացնի ցուցակներ և տա անուններ, թե ովքեր են այդ մարդիկ: Ու բոլոր նրանք, ովքեր պետականության կայացումը սաբոտաժի են ենթարկել, պետք է կանգնեն դատարանների առաջ:

«Նրանք պետք է դաժանորեն պատժվեն, սա մեր պետության գոյության հարցն է: Դուք պատկերացնո՞ւմ եք վիճակը, եթե պաշտպանություն չկարողանայինք կազմակերպել ու նրանք Ստեփանակերտ մտնեին: Դուք պատկերացնո՞ւմ եք»,-հարցադրում է Շիրինյանը և հավելում, որ բոլոր այն պաշտոնյաները, ովքեր բարոյազրկում են և՛ ժողովրդին, և՛ պետությանը, պետք է հեռանան իրենց պաշտոններից:

«Իշխանության լեգիտիմության հարցը ճգնաժամի ժամանակ բացառիկ արժեք է ձեռք բերում: Լեգիտիմությունը լինում է ժողովրդի գիտակցության մեջ իշխանությանն ընդունելը: Դա ո՛չ հրամանով է, ո՛չ ծանոթով, ո՛չ էլ փողով: Ովքեր լեգիտիմ չեն, կորցրել են իրենց լեգիտիմությունը պետք է ասպարեզից հետ քաշվեն»,-ընդգծեց Շիրինյանը:

Նա նկատում է նաև, որ մեր պատմության մեջ բոլոր մեր հերոսները խոնարհ հերոսներ են, իսկ ովքեր այսօր գնում են սահման և սելֆի անելով զորավարներ դառնում, մեզ համար նրանք հետաքրքիր չեն: