Լավ կառավարման փոխարեն՝ անտառը զոհաբերում են

Կառավարությունը 2016թ-ի մայիսից որոշում է կայացրել անցնել խնայողության ռեժիմի՝ կրճատումների և տնտեսումների: Այս մասին հայտարարեց վարչապետ Հովիկ Աբրահամյանը: Եվ քանի որ հրահանգված է կրճատել, ինչպես երևում է Գյուղատնտեսության նախարարությունում բացի անտառապահներից ոչինչն չկա կրճատելու: Այսօր Ազգային ժողովում գյուղատնետսության նախարար Սերգո Կարապետյանը հայտարարել է, որ «Հայանտառ» ՊՈԱԿ-ում, որտեղ աշխատում է մոտ 950 մարդ, նախատեսվում է կրճատել վաթսուն աշխատողի:

Նշենք, որ «Հայանտառ» ՊՈԱԿ-ի տնօրեն Մարտուն Մաթևոսյանը և անտառոլորտի մասնագետները ժամանակ առ ժամանակ նշում են, որ երկրում անտառային մասնագետների պակաս կա, իսկ եղած մասնագետները գերադասում են աշխատել հասարակական կազմակերպություններում կամ այլ ոլորտներում, բայց ոչ անտառային համակարգում: Անտառի աշխատանքը բավականին ծանր է:

Անտառատնտեսությունների քիչ աշխատողների ֆոնին, Ս. Կարապետյանը որոշել է կարճատումներ անել:

Երևի զարմանալ պետք չէ, հատկապես, որ անտառտնտեսության ոլորտի աշխատակիցները երբեմն դժգոհում են, որ Սերգո Կարապետյանին իրենց ոլորտի հարկ եղած ուշադրությունը չի դարձնում, գրեթե ֆինանսավորում չկա, պետբյուջեից միջոցներ չի հատկացվում, աշխատավարձերը նվազագույն են, իսկ ինչ էլ որ կա, ստանում են միջազգային կառույցներից: Այնպես որ զարմանալ պետք չէ, որ հենց անտառտնտեսությունից կրճատումներ կլինեն:

Աշխարհում անտառային ոլորտին, պահպանությանը մեծ ուշադրություն է դարձվում, սակայն Հայաստանում այս ոլորտը մղվել է երկրորդ պլան նախ նախարարի կողմից, հետո նաև դարձավ գյուղոլորտի քավության նոխազը:

Հայաստանի մոտ 10 տոկոսը անտառային տարածք է և այն պետք է հսկվի, պահպանվի, իսկ դրա համար ռեսուրսներ են անհրաժեշտ թե ֆինանսական, թե մարդկային: Ֆինանսկան ռեսուրսները անտառոլորտում գրեթե բացակայում են, իսկ ոլորտը զրկելով նաև մարդկային ռեսուրսներից անտառը մատնվելու է անտերությանը: Վարչապետի հրահանգի համար պատասխան է տալիս անտառը, որը ոչ մի մեղք չունի, որ իրեն վատ են կառավարում, գողանում են, հատում են, իսկ անհրաժեշտության դեպքում՝ զոհում: