Ձիու միս վաճառելու համար՝ ստուգող բժիշկը ոտքով ու գլխով պետք է պատասխան տա

Մամուլում հրապարակված լուրերի համաձայն Կոտայքի մարզի Սևաբերդ և Հատիս համայնքներից օրեր առաջ ձիեր են գողացել: Ըստ աղբյուրների՝ գյուղապետերը գնացել են գողության հետքով և պարզել, որ ձիերին մորթել են ու միսը, տավարի մսի փոխարեն Գումի շուկայում վաճառել 2200 դրամով:

«Միսը ստուգող բժիշկը դրա համար ոտքով ու գլխով պետք է պատասխան տա»,- newspress.am-ի հետ զրույցում անդրադառնալով թեմային` ասաց «Սպառողների միություն» ՀԿ նախագահ Արմեն Պողոսյանը:

Նա պարզաբանում է մսի վաճառքի հետ կապված գործընթացը: Սպառողների շահերի պաշտպանի խոսքով՝ գոյություն ունի սանիտարական բժիշկ, որը նստած է տվյալ վաճառակետում: Նրա պարտավորությունների մեջ է մտնում ստուգել միսը և տալ կնիքված համապատասխան փաստաթուղթ՝ մսի պիտանելիության մասին: Այդ փաստաթուղթը փակցված է լինում երևացող տեղում, ընդ որում այդ թուղթը, որի վրա գրված է «ստուգված է»՝ գործում է միայն մեկ օր:

«Այսինքն այսօրվա թուղթը վաղը ուժ չունի: Սա է կարգը»,- բացատրում է Արմեն Պողոսյանը և հավելում, որ եթե չկա նման փաստաթուղթ, կամ կա բայց երևացող տեղում չէ և կամ էլ գրառումը պարզ չէ, ուրեմն արդեն այդտեղ խարդախություն կա:

Սպառողների շահերի պաշտպանը նկատում է, որ եթե բժիշկը խախտում է այդ սահմանված կարգը, ուրեմն միանշանակ այդտեղ շահ ունի: Բայց միևնույնն է՝ նա չի պատկերացնում, թե ինչպես կարող էր բժիշկը նման խարդախության դիմել՝ իմանալով, որ բացահայտվելու դեպքում պետք է ոտքով ու գլխով պատասխան տա:
Ամեն դեպքում Արմեն Պողոսյանը նկատում է, որ այնքան էլ ճիշտ չի լինի երևույթը կապել միայն Գումի շուկայի հետ:

«Գումի շուկան բացառություն չէ… «Սննդի անվտանգության ծառայություն և տեսչություն» կոչված կառույցը վատ է աշխատում. վերահսկողությունն անվրեպ չէ»,-ասում է Արմեն Պողոսյանն ու նկատում, որ խարդախության բացահայտման դեպքում նախատեսվում է տուգանք, հետո 5 և ավելի ժամանակով փակել այդ առևտի կետը, իսկ բավարար հիմքի դեպքում կարող է հարուցվել նաև քրեական գործ:

Իսկ քանի որ ստուգումները լինում են պլանային, այսինքն տարին մեկ անգամ և ահազանգի հիման վրա, և ոչ անվրեպ, ուստի Արմեն Պողոսյանը չի բացառում, որ տուգանքները վճարելուց և վերաբացվելուց հետո անաբարեխիղճ աշխատողը դարձյալ կշարունակի իր խարդախությունները: