Եղբայր, խորհուրդ մի տվեք՝ մեր պարտքերը տվեք

Գյուղատնտեսության նախարարությունը նախօրեին հաղորդագրություն է տարածել, որտեղ խաղողագործներին խաղողի մշակության խորհուրդներ է տվել, նշելով, որ խոնավ եղանակին բնորոշ հիվանդությունները չկանխելու դեպքում ոչ միայն կորստի կմատնվի տվյալ տարվա բերքը, այլև վազերը կկորցնեն իրենց կենսունակությունը և կվտանգվի հետագա տարիներին բարձր բերքի ստացումը:

ԳՆ-ն իր պարտականությունն է կատարել, սակայն հարց է, թե քանի խաղողագործ է այս տարի ևս մշակում իր հողատարածքը վերամշակող գործարաններին հանձնելու համար:

Հիշեցնենք, որ դեռևս նախորդ տարվանից «Վինար» ընկերությունը Արարատի մարզի Քաղցրաշեն համայնքի խաղողագործներին շուրջ 200 մլն դրամ պարտքեր ունի և դեռևս չի վճարել: Որպես նման պահվածքի հետևանք քաղցրաշենցիները հայտարարել էին, որ խաղող չեն մշակելու և մշակելու պարագայում անգամ չեն հանձնի Վինար ընկերությանը:

Մարդիկ այսօր կանգնած են խնդրի առջև` գումարներ չունեն, որպեսզի գյուղնախի խորհուրդները կատարեն. պետք է բուժանյութ գնեն, պարարտանյութ, եթե այգին մեծ է, ապա բանվորներ վարձեն, որպեսզի կարողանան ժամանակին գյուղատնտեսական աշխատանքներ կատարեն:

Այնպես, որ գյուղնախի խորհուրդներին հետևող չկա, ոչ թե նրա համար, որ չեն ցանկանում, այլ որովհետև փող չունեն, երևի թե այսքան պարտքային քաշքշուկից հետո անգամ մշակելու ցանկություն չունեն:

Երբ գյուղնախը մատչելի պարարտանյութ և դիզվառելիք է ներկրում, ապա այն տրամադրում է հողագործներին միայն նախապես վճարելուց հետո, սակայն ինչ է անելու այս դեպքում, երբ մարդկանց չեն վճարել. դեռևս ոչ մի կոնկրետ գործողություն, սակայն խորհուրդ է տալիս, որ դեղանյութ գնեք և բուժեք:
Հարցնող լինի՝ ինչո՞վ գնեն:

Կարող ենք հավելել, որ խաղողագործները գյուղնախի խորհուրդների կարիքը երևի թե չեն զգում, մեր երկրում ինչ-որ շատ գումար է ծախսվում խորհրդատվությունների վրա, ժամանակ է ծախսվում խորհուրդներ տալու վրա, սակայն կոնկրետ գործ անելուց կարծես պասիվանում ենք:

Պարոնայք գործ անել է պետք, ոչ թե խորհուրդ տալ, եթե աշնանը գյուղնախը հետևողական լիներ պարտքերի մարման հարցում, այսօր զուր ժամանակ չէր վատնի խորհուրդներ տալու համար, որի կարիքը երևի թե չկա:

Գյուղնախը իր հիմնական գործառույթը թողած՝ երկրորդային գործերով է զբաղվում. մարդիկ աշխատել են դափ-դատարկ նստել, անգամ լավագույն խորհուրդը հնարավոր չէ մի կտորի հացի հետ կուլ տալ: