2015 թվականին 2014-ի համեմատ նախագահի աշխատակազմի ընդհանուր ծախսերն աճել են շուրջ 10 տոկոսով

2015 թվականի պետական բյուջեով Սերժ Սարգսյանի աշխատակազմին հատկացվել է 4 միլիարդ 580 միլիոն դրամ: Ճշտված պլանը կազմել է 4 միլիարդ 585 միլիոն 717 հազար դրամ, իսկ ծախսերը 4 միլիարդ 520 միլիոն 988 հազար դրամ, կատարողականը 98.6 տոկոս է եղել. ԱԺ-ի պետաիրավական ու ֆինանսավարկային եւ բյուջետային հարցերի մշտական հանձնաժողովների համատեղ նիստում ՀՀ 2015թ. պետական բյուջեի կատարման հաշվետվության նախնական քննարկման ժամանակ ասաց Սերժ Սարգսյանի աշխատակազմի ղեկավար Վիգեն Սարգսյանը՝ ներկայացնելով նախորդ տարվա կատարված աշխատանքները:

«2015 թվականին 2014-ի համեմատ աշխատակազմի ընդհանուր ծախսերն աճել են շուրջ 10 տոկոսով, որը պայմանավորված է եղել 2014 թվականի հուլիսի 1-ից աշխատանքի վարձատրության նոր համակարգի ներդրմամբ եւ պետական մրցանակների հանձնմամբ: 2015 թվականի արդյունքներով տնտեսվել եւ պետական բյուջե է վերադարձվել 64 միլիոն 729 հազար դրամ»,- նշեց Վիգեն Սարգսյանը:

Սերժ Սարգսյանի աշխատակազմի ղեկավարը ներկայացրեց նաեւ ոչ ֆինանսական ցուցանիշները. «2015 թվականի ընթացքում Սերժ Սարգսյանը կատարել է 20 պետական, պաշտոնական եւ աշխատանքային այց արտերկիր, հյուրընկալել է մի շարք երկրների նախագահների, ընդունել Հայաստանում գտնվող ավելի քան 40 բարձրաստիճան պաշտոնատար անձանց, ՀՀ այցելած օտարերկրյա այլ նախարարների, պաշտոնատար անձանց, հասարակական գործիչների հետ կայացել է 75 հանդիպում, շուրջ 50 հանդիպում է տեղի ունեցել Հայաստանում հավատարմագրված դեսպանների հետ»: