Պոռնիկ աշխարհի ճամարտակումներն ու պոռնկության տրվածները

Ազատամարտիկները վերականգնեցին ժողովրդի ոգին ու ոտքի հանեցին նրանց:

Այս մասին newspress.am-ի հետ զրույցում ասաց «Ղարաբաղ» կոմիտեի նախկին անդամ Աշոտ Մանուչարյանը:

Նրա խոսքով՝ ժողովուրդը հայտնվեց պատերազմի վիճակում, երբ դավաճանված էր իր էությունից:

«Ժողովրդին ապրեցնում էին լափի աշխարհի համակարգում, մինչդեռ ինքը դուրս չէր եկել դեռ պատերազմից: Ապրեցնում էին առաջին հերթին իհարկե մեղավորները՝ իշխանություններ, մտավորականություն, քաղաքական դաշտ…, որոնք առաջին հերթին պետք է ահազանգեին, որ ուրիշ աշխարհում ենք ապրում և այդ կեղծիքը չի կարելի տարածել»,-ասում է Աշոտ Մանուչարյանը՝ հավելելով, որ այն համակարգերից մեկը, որ քիչ թե շատ դիմադրության ոգին պահպանել էր իր մեջ՝ անկախ վայրիվերումներից, դա ազատամարտի, երկրապահի համակարգերն էին, որոնք ոտքի կանգնեցին և ժողովրդի ոգին վերականգնեցին ու միացրեցին ողջ ժողովրդին:
«Առաջին հերթին պարզ դարձավ, որ ինչքան էլ մենք մեր երեխաների մեջից բռնաբարելով հանում ենք իրենց հայկական էությունը, փոխարենը դնում փողի այլասեռված նենգ համակարգը, նրանք այնուհանդերձ մնացին մարդ և այդ երեխաները տվեցին իրենց մարտը: Այսինքն պարզվեց, որ հայ ռազմիկը կառույց է սահամանում»,-ասում է Մանուչարյանն ու նկատում, որ միևնույնն է, շատ կարևոր էր նաև անցյալից եկող ձայները, իսկ անցյալի էությունը պահպանողը, Մանուչարյանի դիտարկմամբ, ազատամարտիկն էր, որ տեսել է առաջին պատերազմ: Աշոտ Մանուչարյանը նշում է, որ հենց այդ ազատամարտիկն ամբողջ ազգին, զինվորների հետ միասին, ոտքի կանգնեցրեց, ծանր հոգեվիճակից:

«Ղարաբաղ» կոմիտեի նախկին անդամի գնահատմամբ՝ այս իմաստով նրանց առկայությունը ոչ միայն կարևոր էր այդ պահին, այլ կարևոր է միշտ:

«Մենք պետք է հասկանանք, որ ոչ թե անցում ենք կատարում չգիտես ինչ բանից՝ բանակցայինի, այլ դա պոռնիկ աշխարհի ճամարտակումներն են և մեր բոլոր այն անձերի, ովքեր տրվել են պոռնկության»,-ասում է Աշոտ Մանուչարյանը՝ պարզաբանելով, որ այսպես շատ կտրուկ է արտահայտվում, քանի որ վիճակն է այսպես պահանջում: Նա հույս է հայտնում, թե միգուցե այդ կտրուկ արտահայտությունը հնարավորություն կտա, որ բութ, հաստ կաշվի հետևից զրահամեքենաներով, թանկարժեք փողկապներով և կանաց թանկարժեք զգեստներով շրջափակված՝ մարդկանց էությանը վերջապես հասնի, որ չի կարելի այսպես, չի կարելի մեր երեխաների մարմիններով անդադար ծածկենք մեր բութ և ստոր էությունը:

Աշոտ Մանուչարյանի խոսքով՝ խնդիրը այլ ուղղությամբ պետք է տանել: Նա նկատում է , որ պատերազմը շարունակվում է և սա հայ-ադրբեջանականը չի:

«Այդ բթերն են մեզ կեղծում, որովհետև իրենք ուզում են իրենց լափին վերադառնալ՝ կրկնելով, որ սա հայ-ադրբեջանական է. ոչ Ադրբեջանը սրա հետ կապ ունի, ոչ Հայաստանը: Համաշխարհային գործընթացները, համաշխարհային պսակի շահերը պահանջում են, որ նրանք անդադար բախեցնեն ժողովրդին. որ վայրկյանին մենք կբախվենք ևս մենք անգամ՝ ինձ հայտնի չէ, և ոչ մեկին հայտնի չէ, բայց մենք պետք է ամեն վայրկյան պատրաստ լինենք բախման: Բայց ոչ միայն դրան պատրաս լինենք, այլև հաստատենք ուրիշ կյանք՝ այդ ստորության աշխարհից դուրս, և այդ մյուս կյանքը հաստատենք, ոչ միայն մեր մեջ, այլև մեր հարևանների և մյուս ժողովուրդների հետ»,-ասում է Մանուչարյանը:

Նրա խոսքով՝ այս գործունեությունը պահանջում է բացարձակ մոբիլիզացիա՝ և՛ռազմական փիլիսոփայության կտրվածքով, և՛ հոգևոր, քաղաքական, մշակութային ու տնտեսական: Մանուչարյանը նկատում է, որ հենց այսպիսի մոբիլիզացված երկրապահ է պետք ստեղծել ողջ հայությունից:

«Աշխարհազոր կամ չգիտեմ… ինչ բառերով ուզում եք անվանեք, դրանց էությունը մեկն է՝ բոլորը պետք է դառնան երկրապահ: Ոչ թե պետք է երկրապահը սահմանից հետ գա, այլ բոլորը որպես երկրապահ լինեն և սահմանում, և այն սահմաններում, որոնք պաշտպանում են՝ փիլիսոփան իր սահմանում, երաժիշտը՝ իր, բայց ոչ որպես փիլիսոփա ու երաժիշտ՝ նենգություն տարածող ստոր էակներ»,- եզրափակեց Մանուչարյանը: