Սերժ Սարգսյանը սխալվել է` ազատագրել է ոչ ռազմավարական տարածքներ

«Եթե սահմանամերձ տարածքները ռազմավարական նշանակություն չունենային, ապա Սերժ Սարգսյանը, լինելով այդ տարածքները ազատագրողներից մեկը, պետք է հիմա հայտարարի, թե սխալ եմ արել, որ ազատագրել եմ ոչ ռազմավարական տարածքները»:

Այս մասին newspress.am-ի հետ զրույցում ասաց ԳԽ նախկին պատգամավոր, նախկին քաղբանտարկյալ Ազատ Արշակյանը` անդրադառնալով ՀՀ նախագահ Սերժ Սարգսյանի այն հայտարարությանն, ըստ որի` 800 հա տարածքները ռազմավարական և մարտավարական նշանակություն չունեն:

«Այդ ազատագրման ժամանակ բազմաթիվ զոհեր ենք տվել, բազմաթիվ նյութական կորուստներ ենք կրել… այդ բոլորը սխալ է եղել, անիմաստ էր այս պայքարը, անտեղի էին զոհերը, մեր Եռաբլուրը, հերոսների Պանթեոնները սխալմունքի հետևանք են»,- վրդովված ասում է Ազատ Արշակյանը:

Նա կհասկանա, եթե Սերժ Սարգսյանը հայտարարի, որ սխալվել է և հիմա ուղղում է իր սխալը ու մեզ համար ոչ պիտանի տարածքները հետ է տալիս:

«Եթե չի հայտարարում, ուրեմն նշանակում է Սերժ Սարգսյանը որոշել է երկու ճակատով չկռվել. այսինքն առայժմ հրաժարվում է պայքարել թուրքերի դեմ, և օգտվելով զինադադարից, շուռ կգա ու կպայքարի մեր առաջին պունկտի հերոսների դեմ»,-ասում է Արշակյանը:

Ըստ նրա` քանի դեռ Հայաստանում կա խորը, համընդհանուր, համակարգային կոռուպցիա` բանակը հաջողություններ ունենալ չի կարող:

«Բանակը ենթարկվում է թալանի և որպեսզի նա կարողանա առաջին ճակատում արտաքին թշնամու դեմ հաջողություն ունենալ` պետք է զինված ճակատը առաջին հերթին ազատել կոռուպցիայից, քանի որ կոռուպցիոներները մեր անվտանգությունը թուլացնում են և Սերժ Սարգսյանը պարզապես տակտիկական քայլ է անում… այսինքն առաջիկայում մենք կտեսնենք հաշվիր մինչև երրորդը, այսինքն մեկից մինչև երրորդը, մինչև հաջորդ եռյակը կգա, մինչև որ կոռուպցիան կհասնի «տանելի» մակարդակի և մենք կկարողանաք պայքարել մեր հողերը հետ վերցնելու համար»,-նկատում է Ազատ Արշակյանը:

Նա ընդգծում է` վիեննաներում, ժնևներում, բեռլիններում Հայկական հարցով զբաղվողները միշտ մոռանում են գլխավոր ուժը՝ հայրենասեր հայ ժողովրդին:

«Կոռուպցիոներների, թալանչիների դեմ պայքարում միշտ կա հայրենասեր հայ ժողովուրդը: Քառօրյա պատերազմը ցույց տվեց, որ, եթե չունենք զենք, հագուստ, ապա ունենք հայրենասեր, քաջ զինվոր, որ պաշտպանում է մեր սահմանները»,-եզրափակեց Արշակյանը: