Վարչապետը կոռուպցիոն աշխատանքի հերոս է. Ազատ Արշակյան

Վարչապետի հայտարարությունն անհեթեթ ու անլուրջ է, թեև դրա մասին հայտարարել է նաև երկրի նախագահը:

Այս մասին newspress.am-ի հետ զրույցում ասաց ԳԽ նախկին պատգամավոր, նախկին քաղբանտարկյալ Ազատ Արշակյանը` անդրադառնալով ՀՀ վարչապետ Հովիկ Աբրահամյանի կոռուպցիայի դեմ պայքարի մասին հայտարարությանը:
Ազատ Արշակյանի դիտարկմամբ` կոռուպցիայի դեմ պայքարելու համար հարկավոր է ունենալ քաղաքացիական հասարակություն, պետք է լինի քաղաքական պատասխանատվություն, իսկ քաղաքական պատասխանատվությունը ենթադրում է իշխանության պարբերական փոփոխություն:
«Եթե վարչապետը հայտարարում է պայքար կոռուպցիայի դեմ` նշանակում է հրաժարական են տալիս: Թող ստուգի իր հրամանագրերը, իր որոշումները՝ վարչապետի և կառավարության որոշումները, պետական գնումները…»,- նկատում է ԳԽ նախկին պատգամավորը և հավելում. «ես հասկանում եմ, որ եթե վարչապետն իրոք պատրաստ է պայքարել կոռուպցիայի դեմ, պետք է ասեր սկսենք ինձանից»,-ասում է Ազատ Արշակյանը:

Ըստ նրա` վարչապետը պետք է հրաժարական տա ու բացի իր փաստաթղթերը համապատասխան մարմինների առջև, եթե կան գաղտնիքներ և դա պետական գաղտնիք չի պարունակում, ապա դրանով կարող է զբաղվել հասարակությունը:
Իսկ քանի դեռ վարչապետը հրաժարական չի տվել, Ազատ Արշակյանը գտնում է, որ նրա հայտարարությունն անլուրջ է:

«Երբ որևէ իշխանություն իր ժամկետը լրանալուց հետո հեռանում է իշխանությունից կամ փոխարինում է հաջորդ իշխանությունը, այդ դեպքում պատասխանատվություն է դրվում: Դա մի տեսակ հոգաեբանական երևույթ է, երբ ցանկացած նոր իշխանություն փորձում է վարկաբեկել հնին, այսինքն ցանկացած նոր իշխանություն սկսում է հնի թերություններից: Հիմա քանի դեռ Հայաստանում իշխանափոխություն, մանավանդ ժողովրդի կամքով, չի լինում, Հայաստանում կոռուպցիայի դեմ պայքար չի կարող լինել»,-վստահեցնում է Ազատ Արշակյանը:

Նրա որակմամբ` կոռուպցիան սկսում է իշխանության զավթումից:

«Իշխանության զավթիչները նրանք են, ովքեր ընտրակեղծիքներով գալիս են իշխանության` քաղաքական հակառակորդներին քաղաքական մրցակցության պայմաններով խեղդելով, անտեսելով ժողովրդի կամքը, նրանք կոռուպցիոներ են: Այդ իմաստով վարչապետը կոռուպցիոներական աշխատանքի հերոս է … »,-ասում է Արշակյանն ու պարզաբանում. «կան սոցիալիստական աշխատանքի հերոսներ, կան կապիտալիստական աշխատանքի հերոսներ և կան կոռուպցիոն աշխատանքի հերոսներ…ես կարծում եմ որ վարչապետին կարելի է կոչել կոռուպցիոն աշխատանքի հերոս»,-եզրափակեց Արշակյանը: