Ծառայողական մեքենաների թիվը Բրիտանիայում և Հայաստանում

Մեծ Բրիտանիայում, որտեղ ՀՆԱ-ն 2,7 տրիլիոն դոլար է, բնակչության թիվը՝ 65 միլիոն, ծառայողական մեքենաների թիվը ընդամենը 190 է: Իսկ Հայաստանում, որի բնակչությունը գրեթե 3 միլիոն է, իսկ ՀՆԱ-ն հազիվ հասնում է 10 միլիարդ դոլարի, պետական համակարգում 1070 մեքենա կա: Ու հիմա, տեսեք- տեսեք ինչ ենք անում, մոտ 800 ծառայողական ավտոմեքենա՝ փաթեթային էլ չէ, փուլ առ փուլ կրճատում ենք: Սա դեռ քիչ է, մի բան էլ հայտարարում ենք, թե ՊՈԱԿ-ների ծառայողական մեքենաները պետք է ընդհանրապես հանել: Էլի ձուկը պոչից ենք բռնում, քանի որ արդյունավետ աշխատելու համար նախ պետք է մաքրել ու վերացնել այդ ՊՈԱԿ-ները:

Օրինակ ինչով է զբաղվում հենց կառավարության ՊՈԱԿԸ՝ ոչ ավել, ոչ պակաս վարչապետի գործունեության մոնիթորինգով: Մինչդեռ այդ ՊՈԱԿ-ի լինելիությամբ վարչապետի աշխատանքի որակը ավելի լավ չի լինի: Իսկ եթե ՊՈԱԿ-ին հատկացվող ամենամսյա գումարը ուղղվեր սահմանամերձ գոտի` հաստատ վարչապետի աշխատանքի որակն ու գնահատականը ավելի լավը կլիներ: Այնպես որ, ձկան գլուխը եղել ու մնում է ձեր ձեռքերում:

Կամ բրիտանացիները ոչխար են, չգիտեն չինովնիկի արժեքը, նրան խնամելու և փայփայելու միջոցները, կամ Հայաստանի չինովնիկներն ուրիշ են: Այսինքն, մարդուց կարևոր և արժեքավոր էակներ, որոնց մասին գիտությունը դեռ իր խոսքը կասի: