Մեքենաների կրճատումը կառավարության PR շոուն է

Մեքենաների կրճատումը դա ընդամենը ծախսերի կրճատում է, որն ի դեպ շատ վաղուց պետք է կատարվեր:

Այս մասին newspress.am-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով մայիսի 19-ին կառավարության նիստում կայացված որոշմանը, ըստ որի, պետական համակարգում կկրճատվեն 797 ծառայողական ավտոմեքենաներ:

Քաղտեխնոլոգի դիտարկմամբ՝ Եվրոպական մի շարք երկրներում, որոնք Հայաստանի համեմատ մի քանի անգամ ավելի բնակչություն ունեն, ծառայողական մեքենաների թիվը բազմակի անգամ քիչ է, քան Հայաստանում:

Դիտարկմանը, թե արդյոք մեքենաների կրճատումները վարչապետի նախորդ շաբաթվա կոռուպցիայի դեմ պայքարի մասին արված հայտարարության գործնական քայլերն են՝ Արմեն Բադալյանը նկատեց. «Սա կոռուպցիայի դեմ պայքարի հետ ընդհանրապես ոչ մի կապ չունի: Կոռուպցիայի դեմ այլ ճանապարհով են պայքարում, որոնցից են օրինակ մենաշնորհի դեմ պայքարը կամ իշխանության ու բիզնեսի տարանջատումը, բայ ոչ մեքենաների կրճատումը: Մի բան է, որ հայտարարում ես, այլ բան, որ այն կատարում ես»,- նկատեց Արմեն Բադալյանն, ում խոսքով՝ այդ մեքենաների տերերը անկասկած միջնորդներ կգտնեն, որ իրենց մեքենաները հետ վերադարձնեն:

«Եթե ցանկանում ես մի բան անել, ապա դրա մասին չես հայտարարում, իսկ եթե ցանկանում ես վերածել շոուի, ապա սկսում ես այդ մասին բարձրաձայնել, ինչ որ քայլեր ձեռնարկել, օրինակ ցույց տալով, թե տեսեք ծառայողական մեքենաներն եմ կրճատում, սա իհարկե շոուի համար արդյունավետ է, բայց կոռուպցիայի դեմ պայքարի հետ ոչ մի կապ չունի»,-ասաց Արմեն Բադալյանը՝ հավելեով, որ սա կառավարության գարնանային փիառ «կամպանիյան» է, առավել ևս՝ դիմացն ընտրությունն են: