Փուլ առ փուլ կկրճատվեն ծառայողական մեքենաները

Կառավարության աշխատակազմի ղեկավար-նախարար Դավիթ Հարությունյանը կառավարության այսօրվա նիստում ներկայացրեց, թե ինչ աշխատանքներ են տարվում վարչապետ Հովիկ Աբրահամյանի հայտնի հայտարարությունից հետո: Ըստ Դավիթ Հարությունյանի, նախ փուլային տարբերակով կրճատվելու են ծառայողական մեքենաները:

«Առաջինը կրճատվելու է 797 ավտոմեքենա: Մենք աշխատել ենք բոլոր նախարարությունների հետ, բացի պաշտպանության և արտաքին գործերի նախարարություններից, բոլոր առընթեր մարմինների հետ, բացառությամբ ոստիկանության, ԱԱԾ և Քննչական ծառայություններից, ինչպես նաև Փրկարար ծառակություններից: Բյուջեից ուղղակի ֆինանսավորվող մեքենաների քանակը կրճատվում է 107-ով, իսկ մարմիններին ենթակա ՊՈԱԿ-ներում, ՓԲԸ-ներում և հիմնադրամներում կրճատվելու է 690 ավտոմեքենա»,- ասաց Դավիթ Հարությունյանը:

Նա նշեց, որ առաջարկվում է ֆինանսների նախարարին հանձնարարել կառավարության հաջորդ նիստում ներկայացնել որոշման նախագիծ, որում արտացոլված կլինի բյուջեից ֆինանսավորվող պետական մարմինների ծառայողական ավտոմեքենաների քանակի նվազեցումը, ինչպես նաև կրճատված ավտոմեքենաների պահպանման ծախսերի նվազեցումը:

Նա նաև տեղեկացրեց, որ պատրաստվել է վարչապետի որոշման նախագիծ, որով, առաջինը՝ արգելվում է սպասարկող, այսինքն հերթապահ մեքենաների ամրագրումը որևէ կոնկրետ պաշտոնատար անձի: Երրորդ, պետք է արգելվի ծառայողական նպատակներով օգտագործելու համար ՊՈԱԿ-ներին, ՓԲԸ-ներին, հիմնադրամներին կամ պետական հիմնարկին պատկանող մարդատար ավտոմեքենաների տրամադրումը հանրապետական գործադիր մարմնին:

Ավտոմեքենաների կրճատման հետ կապված աշխատանքները շարունակական են:

«Բացի այդ, պարոն վարչապետ, առաջարկվում է, որպեսզի բյուջետային միջոցները խիստ նպատակային և արդյունավետ օգտագործվեն, տալ հանձնարարական պետական իշխանության կառավարման մարմիններին, 2016 թվականի պետական բյուջեով նախատեսված, ներառյալ միջազգային կազմակերպությունների և օտարերկրյա կազմակերպությունների կողմից տրամադրված դրամաշնորհային ծրագրերը, ինչպես նաև արտաբյուջետային միջոցների հաշվին իրականացվող ծախսերը»,- ասաց նա:

Դավիթ Հարությունյանը նաև նշեց, որ գնումների անվանացանկի փոփոխությունները պետք է համաձայնեցնել վարչապետի հետ: