Ուռուցքաբանության կենտորնում հիվանդներին դատարկ սրվակներ են տվել. ՎՊ

Վերահսկիչ պալատն իր հաշվետվությունների շրջանակում ստուգել է Բնակչության առողջության առաջնային պահպանում ծրագրի շրջանակներում ՀՀ առողջապահության նախարարության և բժշկական հաստատությունների միջև կնքված պայմանագրերով հատկացված միջոցների հաշվին դեղերի գնման հետ կապված ծախսերը:

Ընտրանքային կարգով ստուգումներ են իրականացվել Երևանի քաղաքապետարանի թիվ 20 պոլիկլինիկա, Երևանի քաղաքապետարանի թիվ 22 պոլիկլինիկա, Վանաձորի թիվ 3 պոլիկլինիկա և ՀՀ առողջապահության նախարարության Վ. Ֆանարջյանի անվան ուռուցքաբանության ազգային կենտրոն ՓԲԸ-ներում:
Ստուգմամբ պարզվել է, որ պոլիկլինիկաներում մի շարք դեպքերում դեղերը գնվում են ներմուծման արժեքից էականորեն բարձր գնով:

Վերահսկողությունն ընդգրկող ժամանակաշրջանում որոշ պոլիկլինիկաներ իրենց գնումների պլանում նշել են գնման ենթակա դեղի առևտրային անվանումը: Մինչդեռ, ըստ ՀՀ կառավարության 2013 թվականի մայիսի 2-ի թիվ 502-Ն որոշման պահանջի, դեղերի գնումների պլանում գնման առարկա հանդիսացող դեղի անվանումը նշելիս գրվում են դեղի միջազգային համընդհանուր կամ ակտիվ բաղադրատարրերի անվանումները:

Բժշկական հաստատությունների կողմից գնումների պլանները կազմվել են ՀՀ կառավարության որոշման պահանջների խախտումներով: Մատակարարից դեղը ստանալիս կամ ընդունելիս դեղի մնացորդային պիտանիության ժամկետների պահանջները խախտվել են:

Որոշ պոլիկլինիկաներ օրենսդրության խախտմամբ իրենց գնումների պլանում ներառել և հետագայում ձեռք են բերել կենսակտիվ հավելումներ, որոնց շրջանառությունը կանոնակարգված չէ: Դեղատնային ցանցում և բժշկական հաստատությունների կողմից դրանք նվում և օգտագործվում են որպես բուժամիջոց` առանց փորձագիտություն անցնելու և դեղերի ռեեստրում գրանցվելու:

Վերահսկիչ պալատը ստուգումների ժամանակ պարզել է, որ Ուռուցքաբանության կենտրոնում իրականացված ստուգման ընթացքում քիմիաթերապիայի բաժանմունքի կողմից տրամադրվել են բուժման նպատակով հիվանդների կողմից ձեռք բերված և 14 օրվա ընթացքում օգտագործված քիմիաթերապևտիկ դեղամիջոցների դատարկ սրվակներ: Ուսումնասիրությամբ պարզվել է, որ այդ ժամանակահատվածում օգտագործված 691 սրվակ դեղամիջոցներից 293-ը Նախարարության Դեղերի և բժշկական տեխնոլոգիաների փորձագիտական կենտրոն ՓԲԸ-ի կողմից փորձաքննություն չեն անցել, ընդ որում, դրանցից 199-ը` ՀՀ դեղերի պետական գրանցամատյանում ընդհանրապես րանցված չեն եղել: Փաստորեն` ստուգման ընթացքում երկշաբաթյա ժամկետի կտրվածքով ստացված արդյունքները վկայում են, որ Ուռուցքաբանության կենտրոնում քիմիաթերապևտիկ բուժման նպատակով հիվանդների կողմից բերված դեղերի շուրջ 42%-ի շրջանառությունը գտնվում է պետական վերահսկողությունից դուրս:

Ստուգմամբ պարզվել է նաև, որ թիվ 22 և Վանաձորի թիվ 3 պոլիկլինիկաներում և Ուռուցքաբանության կենտրոնում որոշ դեղերի պահեստավորումն ու պահպանումը կատարվել է ՀՀ առողջապահության նախարարի 2010 թվականի սեպտեմբերի 9-ի թիվ 17-Ն հրամանով հաստատված կարգի պահանջների խախտմամբ, մասնավորապես լույսի և խոնավության ազդեցությունից պաշտպանում պահանջող մի շարք դեղեր պահպանվել են լուսաթափանց և խոնավ սենյակներում: