Հայաստանում լոլիկի գործով ազդեցիկների խարդախությունը Լարսում բացահայտվեց

Ամիսներ առաջ Ռուսաստանի կառավարությունը հրապարակել է թուրքական այն ապրանքների ցանկը, որոնց ներմուծումը Ռուսաստան սահմանափակվում կամ արգելվում է: Թուրքիայից Ռուսաստան արգելված է ներմուծել թռչնամիս, լոլիկ, սոխ, կաղամբ, վարունգ, նարինջ, մանդարին, խաղող, խնձոր, տանձ, դեղձ, մորի, ելակ, աղ:

Դրանից հետո ռուսական կողմը մի քանի անգամ արձանագրեց, որ Ադրբեջանից, Պակիստանից նաև Հայաստանից ավելացել է բանջարեղենի, մասնավորապես լոլիկի արտահանման ծավալները, որին ի պատասխան ՀՀ գյուղատնտեսության նախարարության սննդամթերքի անվտանգության պետական ծառայությունը ռուսական կողմին տեղեկանք-հիմնավորում է ներկայացրել Հայաստանի Հանրապետության տարածքում լոլիկի արտադրության ծավալների ու ջերմոցային տնտեսությունների կարողությունների վերաբերյալ:

Նշվել է նաև, որ, մասնավորապես, ջերմոցային տնտեսությունների տարածքը հասել է մոտ 700 հա-ի, որին այս տարի կավելանա ևս 70 հա: Արդյունքում ավելացել է նաև լոլիկի արտահանման ներուժը` հասնելով մինչև ամսական 9 հազար տոննայի:

Հավելենք, որ ՍԱՊԾ-ի հայտարարությունը որպես բացարձակ ճշմարտություն չընկալվեց, որովհետև հայտարարությունը անհրաժեշտություն էր:

Իսկ այժմ «Հայկական ժամանակ» թերթը գրում է. «Վերջին օրերին Թուրքիայից 15 «ֆուռ» պոմիդոր է ներկրվել, ինչը կայծակնահար է արել Հայաստանում աճեցվող պոմիդորի շուկան: Պոմիդորի վրա փակցված թուրքական պիտակները Հայաստանում փոխարինվել են կեղծ հայկականով ու փորձել են տեղափոխել ՌԴ:

Վերին Լարսի անցակետում, լաբորատոր անալիզի է ենթարկել լոլիկը, պարզվել է, որ այն պարունակում է թունաքիմիակտներ:

Այստեղ երկու խնդիր կա, նախ ՀՀ սահմանը հատելիս լոլիկը լաբորատոր ստուգում չի անցել, որը պարտադիր պետք է կատարվեր, նաև փորձ է արվել վերաարտահանել այն երկրի լոլիկը, որի ներկրումը ՌԴ արգելված է:

Նշենք, որ Թուրքիայից լոլիկի և այլ բանջարատեսակների ներկրումը Հայաստան մինչև 2013թ-ը արգելված էր, նույն թվականի հունիսի 7-ի գյուղնախարարի հրամանով ուժը կորցրած է ճանաչվել գյուղատնտեսության նախարարի 2009 թվականի սեպտեմբերի 15-ի հրամանը` թուրքական և ադրբեջանական ծագում ունեցող կենդանական և բուսական հումքի ներկրումը ՀՀ տարածք արգելելու մասին: Սակայն այս ընթացքում թուրքական բանջարեղեն ներկրվել է: Այս տարիներին նաև ժամանակ առ ժամանակ ջերմոցատերերը ակցիաներ էին անում՝ բողոքելով թուրքական լոլիկի ներկրման դեմ:

Անընդհատ դժգոհում էին ջերմոցատերերը, որ էժան թուրքական լոլիկը խոչընդոտում է տեղական արտադրության զարգացմանը. Ներկրվող թուրքկան լոլիկի լաբորատոր ստուգման մասին խոսք չկար: Հաճախ անցակետերում չէին էլ կարող ստուգել մի ապրանք, որը պաշտոնապես չէր հատում ՀՀ սահմանը: Իհարկե, պաշտոնապես ներկրվելուց էլ լաբորատոր ստուգման առումով մեծ առաջընթաց չարձանագրվեց:

Ինչևէ, Հայկական ժամանակի վերջին հրապարակումը ևս մեկ անգամ փաստեց, որ ՀՀ անցակետերում թուրքական լոլիկի հետ կապված մի շարք խնդիրներ կան, որոնք առաջանում են ազդեցիկ լծակների ազդեցությունից:

Թեև ՍԱՊԾ-ն արդեն հերքել է ՌԴ-ից թուրքական լոլիկի հետվերադարձի փաստը, միաժամանակ նշելով, որ արդեն մեկ տարի է կառույցի պետի հրամանով ստուգվում է Թուրքիայից ՀՀ ներմուծվող պտուղ-բանջարեղենը, սակայն չկա ծուխ առանց կրակի:

ՍԱՊԾ-ի հայտարարությունից պարզ է, որ կամ այնպիսի ներկրող է, որ կառույցը չի կարող պայքարել նրա դեմ, կամ ՍԱՊԾ-ի գիտությամբ է լոլիկային խարդախությունը տեղի ունենում: