Ադրբեջանցի քունգֆուիստները հրապարակավ ներողություն են խնդրել հայ մարզիկներից

Ադրբեջանցի քունգֆուիստները Լվովում մայիսի 13-ին մարզաձևի Եվրոպայի առաջնության ժամանակ իրենց անվայել պահվածքի համար հրապարակավ ներողություն են խնդրել հայ մարզիկներից, ինչի մասին իր ֆեյսբուքյան էջում տեղեկացրել է Ուկրաինայում Հայաստանի դեսպանատան աշխատակից Տիգրան Սարգսյանը:

Հիշեցնենք, որ մայիսի 13-ին հայ և ադրբեջանցի մարզիկի մենամարտը վերածվել էր զանգվածային ծեծկռտուքի: Հայաստանի հավաքականի անդամ, արցախցի Դավիթ Պետրոսյանին կես քայլ էր բաժանում ադրբեջանցի մարզիկին հաղթելու համար, երբ մրցակցի մարտավկան փորձել է ռինգի կողքից հարվածել Դավթին: Նրան միացել է նաև պարտվողը՝ թիկունքից հարվածելով հայ մարզիկին: Դրանից հետո ադրբեջանական թիմի մարզիչները և մարզիկները նախօրոք դահլիճ բերած մահակներով հարձակվել էին հայ մարզիկների վրա:

«Երեկ երեկոյան Բորիսպոլի օդանավակայանում մեր կիևցի եղբայրները մեր չեմպիոններին ճանապարհում էին Երևան, երբ պատահաբար հանդիպեցին ադրբեջանցի «հերոս մարզիկներին»` իրենց ողջ թիմով, որոնք ևս տուն էին վերադառնում: Տղաները նրանց հետ խիստ, բայց առանց քաշքշուկի, պրոֆիլակտիկ զրույց անցկացրին, որից հետո ադրբեջանցիները ողջ թիմով հրապարակավ ներողություն խնդրեցին մեր տղաներից` սկսած փոքրիկ Արսենից: Փառք մեր չեմպիոններին»,- գրել է Սարգսյանը:

Ադրբեջանական լրատվամիջոցների հետ զրույցում Ադրբեջանի թիմի մարզիչը պատմել է, որ ծեծկռտուքի առիթը դարձել է հայ մարզիկների կողմից Լեռնային Ղարաբաղի Հանրապետության դրոշը բարձրացնելու փորձը: Ադրբեջանի Քունկ ֆուի հավաքականը ոչ սպորտային պահվածքի համար հեռացվել է Եվրոպայի ֆեդերացիայից:

Հավելենք, որ Հայաստանի հավաքականը Եվրոպայի առաջնության ժամանակ նվաճել է 6 ոսկե, 2 արծաթե և 1 բրոնզե մեդալ` թիմային հաշվարկում զբաղեցնելով 2-րդ տեղը: