Պոլիտեխնիկի շենքը մաս-մաս օտարվում է

Newspress.am-ի տեղեկություններով Հայաստանի Ազգային Պոլիտեխնիկական Համալսարանի կամ Պոլիտեխնիկի մի մասնաշենքը վաճառվել է և նախատեսվում է հյուրանոց կառուցել:

«Նման գործարք չի եղել Պոլիտեխնիկի որևէ մասնաշենքի նկատմամբ և այդ լուրերը չեն համապատասխանում իրականությանը»,-newspress.am-ի հետ զրույցում լուրը հերքեց Հայաստանի Ազգային Պոլիտեխնիկական Համալսարանի հոգաբարձուների խորհրդի նախագահ Սամվել Նիկոյանը:

Նրա խոսքով` Պոլիտեխնիկը համարվում է պետական սեփականություն և Պոլիտեխնիկի որևէ մասնաշենքի օտարման համար պետք է կառավարության որոշում, քանի որ դա պետության, այլ ո’չ թե Պոլիտեխնիկի սեփականությունն է:

ՀՀ Ազգային Պոլիտեխնիկական Համալսարանի տնտեսական գծով պրոռեկտոր Արտաշես Նազարեթյանն էլ ընդգծեց, որ Պոլիտեխնիկի մասնաշենքերից մեկը բաժանված է Պոլիտեխնիկի ու Ճարտարապետության և շինարարության համալսարանների միջև:

Հարցին, թե ինչքանո՞վ է վաճառվել Պոլիտեխնիկի մասնաշենքը, Արտաշես Նազարեթյանը ծիծաղելով պատասխանեց.

«Օօ~օօ, շատ հետաքրքիր տվյալների եք տիրապետում: Պոլիտեխնիկը մասնաշենք վաճառելու իրավունք չունի, քանի որ Պոլիտեխնիկը չունի սեփական կորպուսներ»,-ասաց Նազարեթյանը` հավելելով, որ ամբողջ մեր անշարժ գույքը կառավարության սեփականության է և պատկանում է Պետական գույքի կառավարման վարչությանը:

«Եթե չունի պոլիտեխնիկը սեփականություն, ինչպե՞ս կարող է վաճառել: Ես չեմ հիշում, որ որևէ կորպուս օտարված լինի կամ տրված լինի օգտագործման իրավունքով. դա անհնար է, օրենքով է արգելված»,-ասաց նա:

Դիտարկմանը, թե բոլորը տեղափոխվում են արդեն վաճառված մասնաշենքից, որպեսզի սկսեն հյուրանոցի կառուցումը` արձագանքեց.

«Դա հերյուրանք է, եթե վաճառված լիներ որևէ մասնաշենք, մեզ էլ կհարցնեին»,-ասաց նա` հավելելով, որ ռեկտոր Արա Ավետիսյանի ժամանակ մի փոքր մաս օտարվել է կառավարության որոշմամբ:

Միևնույն ժամանակ նա չբացառեց, որ արդեն 12 տարի փակված ու մի քիչ էլ փլուզված վթարային մասնաշենքը, որը կառուցվել է 30-ականներին, հնարավոր է հանրակացարան կառուցեն, սակայն դեռևս փակ է:

Հայաստանի Ազգային Պոլիտեխնիկական Համալսարանի Ֆիզիկայի ամբիոնի վարիչ Արամ Խաչատրյանն էլ նկատեց, որ մասնաշենքը հյուրանոցի վերածելու մասին լուրեը լրիվ «բլեֆ է»:

«Հին խարխլված մի բան է, դա չի էլ օտարվել»,-ասաց նա` հավելելով, որ հանրակացարան կառուցելու մասին խոսակցություններ եղել են, բայց  կառուցվի, նշեց, որ խոսակցություններ են եղել, սակայն ինչպես Արտաշես Նազարեթյանը, նա ևս նշեց, որ այդ մասնաշենքը գոնե առայժմ փակ է: