Անցած շաբաթվա կարևոր իրադարձությունները` հայկական սպորտում

– Միջազգային օլիմպիական կոմիտեն աշխարհի ու Եվրոպայի նախկին չեմպիոն, հայաստանցի ազատ ոճային ըմբիշ, 65 կգ քաշային Դավիթ Սաֆարյանին Ռիո դե Ժանեյրոյի օլիմպիական խաղերի ուղեգիր շնորհեց:

Դավիթը վարկանիշային մրցաշարերում բարձր տեղեր էր զբաղեցրել, սակայն ուղեգրի չէր արժանացել: Բայց երբ ամեն բան նրա համար համարվում էր ավարտված, ուրախալի լուր ստացվեց ՄՕԿ-ից: Սերբիայում անցկացված առաջին վարկանիշային մրցաշարում երկրորդ տեղն զբաղեցրած ուկրաինացի Անդրեյ Կվյատկովսկու դոպինգ ստուգումը դրական արդյունք էր ցույց տվել եւ նա որակազրկվել էր, իսկ Մոնղոլիայում վարկանիշային ցուցակում Դավթից առաջ գտնվող վրացի Զուրաբի Յակուբաշվիլին էլ լրացրել էր վարկանիշային պահանջը, Դավիթ Սաֆարյանը նույնպես ամառային 31-րդ օլիմպիական խաղեր մեկնելու իրավունք ստացավ:

– Անցած շաբաթվա մարզական աշխարհի թոփ իրադարձությունը Մոսկվայի «Լուժնիկի» մարզահամալիրում ընդհանուր մենամարտերի OFS 8 մրցաշարում Արմֆայթինգ ֆեդերացիայի անդամ 56 կգ քաշային Ալբերտ Ղազարյանի հաղթանակն էր ադրբեջանցի Ռուսլան Մուրթազովի նկատմամբ:

Հայ մարզիկն ընդամենը 56 վայրկյանում խեղդող հնարքով մրցակցին ստիպեց ընդունել իր պարտությունը: Ադրբեջանցին նախապես նկարահանված տեսանյութում մենամարտից առաջ Ալբերտի վրա հոխորտացել էր, թե ինքը արդեն առաջին ռաունդում նրան շարքից դուրս կբերի: Ալբերտը դրան չէր արձագանքել՝ հայտարարելով, որ կպատասխանի ռինգում: Այդ օրը դայլիճում է եղել նաեւ ՌԴ նախագահ Վլադիմիր Պուտինի մամուլի խոսնակ Դմիտրի Պեսկովը:

Հատկանշական է, որ այդ խայտառակ պարտությունից հետո Ադրբեջանը հրաժարվել է ճանաչել իր մարզիկին՝ ամենատարբեր ու անհեթեթ պատճառաբանություններով:

-Այս շաբաթ Ավստրալիայից Հայաստան եկավ պրոֆեսիոնալ բռնցքամարտիկ, աշխարհի ութ չեմպիոնական գոտիներ նվաճած Վախթանգ Դարչինյանը: Աշխարհի նախկին բացարձակ չեմպիոնը հունիսի սկզբներին WBO վարկածով գոտու համար ԱՄՆ-ում մենամարտելու է աշխարհի գործող չեմպիոն, մեքսիկացի Հուգո Ռուիսի հետ: «Կատաղած Ցուլ» մականունով վանաձորցին Ծաաղկաձորում երկշաբաթյա մարզումներ է անցկացնում, որից հետո մեկնելու է մրցավայր: Սակայն մինչ այդ մեկնելու է Արցախ՝ հանդիպելու եւ ոգեւորելու սահմանները պաշտպանող հայ զինվորներին եւ արցախահայությանը:

– Շախմատի Հայաստանի կանանց ազգային հավաքականի առանցքային խաղացող Լիլիթ Մկրտչյանը Խանտի-Մանսիյսկի «Յուգրա» ակումբի կազմում մասնակցեց Սոչիում անցկացված Ռուսաստանի թիմային առաջնությանը եւ նվաճեց բրոնզե մեդալ:

– Բռնցքամարտի Հայաստանի կանանց ազգային հավաքականի երկու անդամներ, երիտասարդների աշխարհի ու Եվրոպայի չեմպիոն, 51 կգ քաշային Անուշ Գրիգորյանը եւ 60 կգ քաշային Աշխեն Հովհաննիսյանը նախապատրաստվում են Աստանայում կայանալիք կանանց աշխարհի առաջնությանը, որտեղ մեդալներից բացի խաղարկվելու են նաեւ օլիմպիական ուղեգրեր: Վարկանիշ կնվաճեն յուրաքանչյուր քաշային կարգում 1-ից 4-րդ տեղերն զբաղեցնողները: Մեր աղջիկները մարզվում են տղամարդկանց հավաքականի հետ, ինչը մարզիչների խոսքերով դրական արդյունք է տալիս:
Հայաստանն առայժմ ունի օլիմպիական 23 վարկանիշ:

– Այս շաբաթ Թբիլիսիում անցկացվեց Արեւելյան Եվրոպայի տարածքային հակադոպինգային կազմակերպության (այն ղեկավարում է Հայաստանի հակադոպինգային կազմակերպության ղեկավար, պրոֆեսոր Արեգ Հովհաննիսյանը) ուսուցողական սեմինար, որի ավարտին հայաստանցի երկու մասնագետ բժիշկներ՝ Դավիթ Մոսինյանը եւ Անժելա Սահակյանը, մարզիկներից արյան դոպինգ անալիզ վերցնելու լիցենզիա ստացան:

– Կոսովոյի Գժակովա քաղաքում մեկնարկել է շախմատի Եվրոպայի տղամարդկանց անհատական առաջնությունը, որին մասնակցում են Հայաստանի ութ շախմատիստներ՝ յոթ գրոսմայստեր եւ մեկ միջազգային վարպետ: Խաղացվել է երկու տուր: Մեր շախմատիստներից չորսը, այդ թվում նաեւ միջազգային վարպետ Մանուել Պետրոսյանը, տարել են երկուական հաղթանակ եւ մրցաշարային աղյուսակը գլխավորողների շարքում են: