Նախագահները նստեն՝ ի՞նչ խոսեն. երկրորդ անգամ նույն գետը մտնել չի կարելի

9797Սարգսյան-Ալիև հանդիպումը ոչինչ չի տա:

Newspress.am-ի հետ զրույցում իր տեսակետը հայտնեց քաղաքագետ Լևոն Շիրինյանը:

Հիշեցնենք, որ մայիսի 16-ին Վիեննայում նախատեսվում է Հայաստանի Հանրապետության նախագահ Սերժ Սարգսյանի և Ադրբեջանի նախագահ Իլհամ Ալիևի հանդիպումը, որին ներկա կլինեն նաև ԱՄՆ, ՌԴ և Ֆրանսիայի արտգործնախարարները:

Ըստ քաղաքագետի` կոնկրետ պահանջներ կան դրված, որոնք պետք է նախ Ադրբեջանը ընդունի, բայց այսօր Սարգսյան-Ալիև հանդիպման մասին խոսելն անիմաստ է:

«Ես լինեի չէի գնա այդ հանդիպմանը: Նրանք մարդասպան են, որը պատերազմի հետ կապ չունի. գլուխն են կտրում, մարմնի մասեր են կտրում: Գնում են հանդիպեն հանցագործի հետ, գնում են հետը նստեն՝ ի ՞նչ խոսեն: Հիմա նստել-խոսել նշնակում է ընդունել այն ինչ արեցին»,- նկատեց քաղաքագետը:

Նրա դիտարկմամբ, այս ֆորմատն ընդհանրապես պետք է փոխվի, քանի որ այն ինչ առաջարկվում է եռանախագահների կողմից, ըստ քաղաքագետի, կյանքի չի կոչվի:

«Երբ արտաքին խաղացողներին կամ Ադրբեջանին ձեռնտու լինի՝ հենց այդ օրն էլ կշարունակեն պատերազմն ու ոչինիչ չեն լսի: Իրենք այդ օրերին կդառնան խուլ ու համր, ինչպես արդեն մեկ անգամ եղավ»,-ասաց Լևոն Շիրինյանը:

Նա առաջարկում է պայքարի նոր ձև, որը կփոխի հարցի լուծման ամբողջ տրամաբանությունը և որի արդյունքում կունենանք այն Արցախը, որն ուզում ենք ունենալ: Իսկ այն ինչ ունենք այսօր, ըստ քաղաքագետի, հավերժ պատերազմի ճանապարհն է:

«Սա 1994-95 թթ որոշումն է՝ Մինսկի խումբ, որի արդյունքում միանշանակ կլինեն նույն զոհերը, ուրիշ ոչինչ չկա»,-նկատում է Լևոն Շիրինյանը՝ հավելելով, որ այս պատերազմում, թեև կորուստներ եղան, բայց այն ստրատեգիական հաղթանակ էր տարել:

«Հիմա մենք պետք է ռեալիզացնենք այդ հաղթանակը: Մենք նույն Եվրոպական ճանապարհով գնալ չենք ուզում: Երկրորդ անգամ նույն գետը մտնել չի կարելի և վերջ»,-եզրափակեց Լևոն Շիրինյանը: