Կոռուպցիայից թուլացած Հայաստանի պատասխանը ԵՄ դեսպանին

Մինչ Հայաստանը կառավարության թիվ մեկ դեմքի մակարդակով կոռուպցիայի դեմ պայքարի հերթական հերթապահ հայտարարությունն է անում, Հայաստանում ԵՄ պատվիրակության ղեկավար Պյոտր Սվիտալսկին ահազանգում է, որ կոռուպցիան թուլացնում է Հայաստանին. «Կոռուպցիայի դեմ պայքարը ազգային անվտանգության հարց է: Կոռուպցիան ձեզ ուժեղ չի դարձնում, կոռուպցիան ձեզ թուլացնում է»: Կոռուպցիայից թուլացած Հայաստանի կառավարության աշխատակազմի ղեկավար-նախարար Դավիթ Հարությունյանը, սակայն, որպես կոռուպցիայի դեմ պայքարի լավագույն օրինակ, առանձնացնում է կառավարության նախորդ տարվա որոշումները՝ ավելացնելով «Կոռուպցիայի դեմ աշխատանքը տարվում է: Մենք ունենք բազմաթիվ ծրագրեր, որոնց ուղղությամբ լրջագույն քայլեր են կատարվում և իրենց արդյունքը տալիս են: Այլ է, որ արդյունքն անմիջապես շոշափելի չէ: Վարչապետի հարցադրումը հենց դա էր: Մենք շատ արագ ենք սովորում լավին, վատը, բնականաբար, մեր աչքին ավելի արագ է երևում, և դա լավ է: Բայց ասել, որ աշխատանք չի կատարվում, սխալ կլինի»:

Դավիթ Հարությունյանի այս միտքը մոտավորապես կրկնությունն էր շարմազանովյան մտքին. «Երբ սերմը ցանում ես, միանգամից չի աճում, այն պետք է ջրեն, արև լինի, փայփայեն. ժամանակ է պետք, որ դառնա պտուղ»: Եվրամիության դեսպանը շատ ավելի ռեալ մտածող է, նա Հայաստանի իշխանությունից հակակոռուպցիոն կոնկրետ քայլեր է ակնկալում. «Կան պայմաններ, մեզ պետք են կոնկրետ արդյունքներ»: Ավելին ԵՄ դեսպանը Հայաստանի իշխանություններին նախազգուշացրել է, որ եթե կոռուպցիայի դեմ տեսանելի ու արդյունավետ պայքար չմղվի, Եվրամիությունը չի հատկացնի այդ նպատակով նախատեսված 15 մլն եվրոն. «Ու եթե չտեսնենք նմանատիպ արդյունքներ, ապա այս 15 մլն-ը չի ծախսվի, չի փոխանցվի ՀՀ կառավարությանը»: Ի դեպ ԵՄ դեսպանը ամենապարզունակ ձևն է առաջարկում կոռուպցիայի դեմ պայքարում անընդհատ ձախողած ՀՀ իշխանություններին՝ստեղծել անկախ և ուժեղ հետաքննող մարմին, որը կարող է արդյունավետ պայքարել կոռուպցիայի դեմ, և պետք է նման մարմին ստեղծել: