Շարմազանովյան սերմնաբուծության թեզն ընդդեմ յոնջաների ու մոլախոտերի

«Միշտ չէ, որ արդյունքները երևում են միանգամից, երբ սերմը ցանում ես, միանգամից չի աճում, այն պետք է ջրեն, արև լինի, փայփայեն. ժամանակ է պետք, որ դառնա պտուղ: Հիմա սերմը ցանվել է, պտուղ դառնալու համար պետք է ժամանակ, նաև, որ այդ ժամանակի ընթացքում տարբեր մոլախոտերն այդ սերմը չուտեն»:

ՀՀԿ Գործադիր մարմնի նիստից հետո ՀՀԿ խոսնակ Է. Շարմազանովը այսպես է մեկնաբանել ՀՀ վարչապետ Հովիկ Աբրահամյանի` պետական կառավարման ոլորտի ծախսերի օպտիմալացման, կոռուպցիայի դեմ պայքարի անհրաժեշտության մասին հայտարարությունը, որը, ըստ Շարմազանովի, պետք է դիտարկել Նախագահ Սերժ Սարգսյանի փետրվարի 12-ի ելույթի առաջնահերթությունների համատեքստում:

Նախ հակիրճ Հովիկ Աբրահամյանի ելույթի մասին. այն պարզապես ծաղկաքաղ էր որոշ լրատավամիջոցների կողմից պարբերաբար հնչեցվող մտահոգություններից, և լուրջ ոչինչ ասված չէր: Այնտեղ չէր երևում, թե վարչապետը ինչ մեխանիզմներով է փորձում պայքարել կոռուպցիայի դեմ, առավել ևս որ փաստացի նա այդ պայքարի թիվ մեկ դերակատարն է: Հենց Հովիկ Աբրահամյանի ձեռամբ մեկ տարի առաջ ստեղծեց հակակոռուպցիոն խորհուրդ և հայատարարվեց անհաշտ պայքար կոռուպցիոներների դեմ: Մեկնարկած խաղի հաշիվը մեկ տարի անց 0:0 է, քանի որ Հովիկ Աբրահամյանը ինչպես կասեր Շարմազանովը՝ սերմ է ցանել ու չի ջրել, չնայած որ այդ ելույթում իրականում շատ գործոններ ջրվեցին: Օրինակ այն, որ նույնիսկ դպրոցականը կասի Հայաստանում, որ ապրանքի մենատերը ով է. շաքարավազը Սամվել Ալեքսանյանինն է, բանանը արդեն գործազուրկ Միհրան Պողոսյանինն է ու այսպես շարունակ այս սերմերը ծիլեր են տալիս` կողքից էլ մոլախոտերն են սնվում: Այս դեպքում մի տեսակ անհասկանալի է խոսում Շարմազանովը, կամ էլ սերմնաբուծության ոլորտին լավ չի տիրապետում:

«Սերմը ցանվել է ՀՀ նախագահի կողմից, մենք բոլորս պետք է հոգ տանենք, որպեսզի յոնջաները սերմին կուլ չտան, որ սերմը դառնա առողջ Հայաստանի առողջ պտուղը»,-ասել է է. Շարմազանովը:

Իրականում յոնջան բավականին որակյալ անասնակեր է, որի սերմը ցանում են, յոնջան աճում է, անասունն ուտում է, կաթ է տալիս: Գուցե Շարմազանովը արտահայտչամիջոց է օգտագործել՝ ի նկատի ունենալով քաղաքական ու տնտեսական յոնջաներին, որոնք մի անգան ջրվելոց աճում ու աճում են, մետաստազներ են տարածում՝ մտնելով մեր պետության ու նրա քաղաքացիների գրպանը:

Ինչևէ սերմնաբուծության մասին շարմազանովյան թեզը առաջին հերթին պետք է ուղարկել դասականի «քոսոտ» երկրի ԳԱԱ սերմնաբուծության ոլորտն ավելի լավ տիրապետող գիտնականերին, առաջարկել կառավարությանը ստեղծել յոնջաների ու մոլախոտների դեմ պայքարի հատուկ խորհորդ, գյուղնախարարին էլ հանձնարարել առայժմ զերծ մնալ յոնջան ու մոլախոտը պարարտացնելուց, մինչև որ շամազանովյան թեզը կանցնի գրաքննության ու դաբրոյի միջով: