Արփինե Հովհաննիսյանը գողականին հանեց «քառասունքից»

Հայաստանի արդարադատության նախարար Արփինե Հովհաննիսյանի հրամանով, մայիսի 6-ի երեկոյան «Նուբարաշեն» ՔԿՀ պետ է նշանակվել արդարադատության գնդապետ Սերոբ Հարությունյանը, իսկ Ռուբիկ Ստեփանյանն ազատվել է աշխատանքից՝ իր դիմումի համաձայն:

Հիշեցնենք, որ դեռևս մարտ ամսին ՀՀ ոստիկանության պետ Վլադիմիր Գասպարյանի հրամանով՝ աշխատանքից ազատվել էին ոստիկանության Կոտայքի մարզային վարչության պետ Սերոբ Հարությունյանը, Շիրակի մարզային վարչության պետ Գրիշա Ամիրխանյանը և Արագածոտնի մարզի վարչության պետ Գրիգոր Գորիգորյանը:

Թեև պաշտոնապես հայտարարվեց, որ նրանք աշխատանքից ազատվել են ոստիկանական համակարգում իրականացվող բարեփոխումների շրջանակներում, սակայն, ըստ տարածված լուրերի, նրանք աշխատանքից ազատվել են հանցաշխարհի հետ սերտ հարաբերությունների և նրանց մասնակցությամբ ու ընկերակցությամբ կերուխումների մասնակցելու համար:Աշխատանքից ազատվելուց առաջ էլ ըստ տարածված լուրերի նրանք մասնակցել էին ծննդյան մի արարողակարգի, որին ներիկա է եղել նաև կայարանցի Թևոսիկը:

Եվ հենց դա էլ, ըստ էության, չհանդուրժեց ոստիկանապետը:

Ըստ որոշ տեղեկությունների, Արդարադատության նախարար Արփինե Հովհաննիսյանի նորանշանակ կադրը՝ Սերոբ Հարությունյանը, Հյուսիսային պողոտայում էլիտար բնակարան ունի, բոլորովին վերջերս 20 հազար դոլար արժողությամբ ջահ է գնել բնակարանի համար, Հյուսիսային պողոտայի ավտոկայանատեղիում կայանվում են նրա թանկարժեք մեքենաները, ըստ որոշ լուրերի, մինչև 10 ավտոմեքենա:

Ըստ հավաստի լուրերի, «Նուբարաշեն» ՔԿՀ պետ Սերոբ Հարությունյանին Երրորդմասցի Լյովիկը նվիրել է ավտոտեխզննման կետ:

Այս ունեցվածքի և իրադարձությունների մեջ արտառոցը ոչ թե ոստիկանների և քրեական հեղինակությունների ընկեր-բարեկամությունն է, այլ այն, որ նոր էր լրացել Սերոբ Հարությունյանի ոստիկանության համակարգից հեռացնելու «քառասունքը», երբ նրան Արփինե Հովհաննիսյանը նշանակեց Նուբարաշեն ՔԿՀ-ի պետ:

Ոստիկանության որոշ աշխատակիցների և քրեական հեղինակությունների կապը վաղուց է շրջանառվում ԶԼՄ-ներում, այնպես որ հնարավոր չէ, որ Արդարադատության նախարար Արփինե Հովհաննիսյանը, ով մշտապես հետևում է մամուլին, տեղյակ չլիներ նորնշանակ Նուբարաշեն ՔԿՀ-ի պետի հետաքրքիր ներկայի մասին:

Տեղյակ լինելով հանդերձ, Արփինե Հովհաննիսյանը նրան նշանակել է ավելի բարձր պաշտոնի՝ նպաստելով նման կենսագրություն ունեցող անձանց կարիերային: Այնպես որ ոստիկանության համակարգում գողական լինելը պրիստիժ չէ, իսկ իրավական համակարգում՝ փառք ու պատիվ: