Արամ Հարությունյանի օֆշորն ու պատասխանատու հայտարարությունը

Հետաքննող լրագրողների միջազգային կոնսորցիումը (The International Consortium of Investigative Journalists) հրապարակել է 214.000 օֆշորային ընկերությունների և օֆշորային սխեմաներում ներգրավված անձանց ցանկը և պարզվել է, որ Հայաստանի բաժինը այդ ցուցակում բավականին մեծ է:

Որոնման համակարգով Հայաստանի անունը փնտրելիս փաստաթղթերում ի հայտ է եկել ավելի քան 30-ից ավել մարդու անուն: Արդեն շրջանառվում են որոշների անուններ` որոնց թվում է նաև նախկին բնապահպանության նախարար, Արամ Հարությունյանը, մարդ ում պաշտոնավարումը ի սկզբանե լուրջ խոսակցությունների առիթ է տվել: ՕԵԿ-ից «բուծված» այս նախարարի մասին ժամանակին, ըստ օդում կախված լուրերի, ասում էին, որ նախարար նշանակվելու համար Արամ Հարությունյանը վերևներին 50000 դոլար կլորիկ գումար է մուծվել:

Նախարար աշխատած տարիներին Արամ Հարությունյանը նախ մասնագիտացավ հանքարդյունաբերության ոլորտում` դառնալով խոշոր հանքատեր, ապա ինչպես ժամանակին խոսվեց, սկսեց խորանալ ընտրակեղծարարության մեջ ՝առաջին քայլերն անելով Եղվարդ քաղաքում` պաշտպանելով այն ժամանակ ոչ այնքան հայտնի ՍԱՍ-ի Արտակին: Ընտրակեղծարարությունը իրականում պարտադրված, բայց ոչ այնքան կարևոր մասնագիտություն է, որքան օֆշորագիտությունը, որին լավ տիրապետելու դեպքում միանգամից միլիոնատեր կոչում ես ստանում: Արամ Հարությունյանը կամ ինչպես արդեն նրան անվանում են «Բուլկի» Արամը լուրջ կարողություններ ունի, այդ մասին բազմիցս գրվել է` հիմա էլ դրան ավելացավ օֆշորը, ու միանգամից ՀՀ ջրային պետական կոմիտեի նախագահը ոչ ավել, ոչ պակաս, ինչպես կասեր դասականը, դարձավ «քոսոտ» երկրի պանամական «օֆշորիստը»:

Ընդհանուր առմամբ պանամական փաստաթղթերը բացահայտում են կոռումպացված երկրների կոռումպացված գործիչների մութ անցյալը: Հայաստանում առաջին անգամ օֆշոր կոչվածը շրջանառվեց նախկին վարչապետ Տիգրան Սարգսյանի անվան շուրջ, բոլորովին վերջերս Քեթրին Միհրանի անունը շրջանառվեց ու նա հրաժարականի դիմում գրեց: Բայց փաստացի Հայաստանում օֆշորը լուրջ մետաստազներ է տարածել՝ ակադեմիայից մինչև ջրային ոլորտ: Եվ արդեն օֆշորը ջրելու լուրջ աշխատանք է սկսվել: Նախ հանրապետական Վահրամ Բաղդասարյանը խորհուրդ է տալիս զերծ մնալ անուններ տալուց և ավելորդ շտապողականություն ձեռք բերելուց, Խոսրով Հարությունյանն էլ բարձրաձայնում է, որ օֆշորային գոտիներում հաշիվներ ունենալը չի կարելի համարել դատապարտելի: Ջրային պետական կոմիտեի նախագահ Արամ Հարությունյանն էլ ամենայն պատասխանատվությամբ հայտարարում է.«Եթե անգամ այդ ցուցակում Հայաստանի որևէ քաղաքացի կա՝ Արամ Հարությունյան անունով, ապա նրա հետ ես ոչ մի առնչություն չունեմ»: