Երկիրը բռնաբարած գողերի հոգում պետք է ոչ թե անդորր, այլ տագնապ լինի. Աշոտ Մանուչարյան

«Մեր քայլերը դիվանագիտական չեն, մեր քայլերը արտաքին քաղաքականության մեկ տոկոսից պակասն է: Դիվանագետները վավերացնում են այն, ինչ անում են քաղաքական գործիչները»:

Newspress.am-ի հետ զրույցում ասաց քաղաքագետ Աշոտ Մանուչարյանը՝ խոսելով սահմանին տիրող հարաբերական անդորրից ու երկրի իշխանության դիվանագիտական քայլերից:

Աշոտ Մանուչարյանի դիտարկմամբ մենք գտնվում ենք երրորդ համաշխարհային պատերազմի շրջանում և հանդիսանում ենք այդ պատերազմի կիզակետերից մեկը, համենայնդեպս, միտում կա այդպիսին լինելու:

Նա նկատում է, որ եթե մենք չենք ուզում դառնալ պատերազմական երկիր, ապա պարտավոր ենք պատերազմի մյուս գործոնները ընթացքի մեջ դնել, սակայն Մանուչարյանի կարծիքով՝ այս ամենը մեր ղեկավարները չեն հասկանում, որովհետև այլ ուղղվածություններ ու անձնական մտահոգություններ ունեն:

«Հիմա մեր ղեկավարները պետք է տարրական մի բան հասկանան. երբ ինչ-որ հրթիռ է թռչում ինչ-որ տեղից, մեր օլիգարխների նման անհասկացող է ու չի հասկանում, թե ինչին է հարվածում: Պետք է հասկանալ, որ այդ հրթիռը, որքան կարող է հարվածել մեր բանակին ու խրճիթներին, այնքան էլ նույն այդ օլիգարխներին, հարգարժան նախարարներին, վարչապետին ու նրանց պալատներին»,- նկատում է Մանուչարյանը:

Քաղաքագետի որակմամբ, որպեսզի այդ անհասկացող հրթիռները չշարունակեն հարվածել, պետք է սթափվել ու փոխել իրավիճակը:

«Մեր երկրի պաշտոնյաները, ովքեր մինչև այժմ զբաղված էին երկիրը բռնաբարելով ու թալանելով, պետք է փոխեն երկրի մթնոլորտը: Նրանք պետք է այդ ամբողջ թալանը ուղղեն առաջատար ոլորտներին՝ երկրի տնտեսական զարգացման համար»,-ասաց Աշոտ Մանուչարյանը:

Անդրադառնալով սահմանին տիրող հարաբերաական անդորրին, նա նկատեց, որ պետք է անհանգստանալ, ոչ թե սահմանին տիրող անդորրի, այլ գողերի հոգիներում բուն դրած անդորրի համար:

«Էդ գողերի հոգիներում պետք է ոչ թե անդորր լինի, այլ տագնապ, որը կարգավորի սահմանի վտանգավոր զարգացումները»,-եզրափակեց Մանուչարյանը: