Պետք է արգելվի ոչ թե գումար հավաքելը, այլ այդ գումարը սրան-նրան տալը. Անահիտ Բախշյան

«Պետք է արգելվի ոչ թե վերջին զանգին շրջանավարտներից գումար հավաքելը, այլ այդ գումաները կամ նվերները սրան-նրան տալը»,- newspress.am-ի հետ զրույցում ասաց «Բարև Երևան» խմբակցության անդամ Անահիտ Բախշյանը, անդրադառնալով ուսումնական տարվա ավարտին դպրոցներում իրականացվող դրամավաքությանը:

Ըստ նրա՝ շրջանավարտները անպայման ուզում են նշել և պետք է նշեն իրենց կյանքում այդ կարևոր իրադարձությունը, քանի որ դա յուրաքանչյուր մարդու կյանքում չկրկնվող օր է, որը դպրոցը և ծնողները համախբվելով երեխաների համար պետք է հնարավորինս հիշարժան դարձնեն:

«Առանց որոշակի գումար հավաքելու չի լինում: Եվ սխալ է դրա անունը դնել դրամահավաք և կատեգորիկ արգելել, ինչը որ արեց քաղաքապետ Տարոն Մարգարյանը: Ես պարոն Մարգարյանի ձևակերպումը ճիշտ չեմ համարում: Պետք է արգելվեր ոչ թե վերջին զանգին շրջանավարտներից գումար հավաքելը, այլ այդ գումաները կամ նվերները սրան-նրան տալը»,- նշեց Անահիտ Բախշյանը:

Newspress.am-ի այն հարցին, թե ինչպես կմեկնաբանի կրթության ազգային ինստիտուտում անցկացվող հարկային ստուգումները, Անահիտ Բախշյանը խուսափեց կոնկրետ պատասխան տալ, նշելով. «ես նման բաներից տեղյակ չեմ»:

Նա չցանկացավ արձագանքել նաև մամուլում տեղ գտած այն հրապարակմանը, ըստ որի կրթության ազգային ինստիտուտը մեքենա է նվիրել ԿԳ նախկին նախարար Արմեն Աշոտյանին: