«Բանանցը» երրորդ անգամ տիրացավ պատվավոր մրցանակի

*Մայիսի 5-ին ՖԻՖԱ-ի հրապարակած հավաքականների վարկանիշային դասակարգման ցուցակում ֆուտբոլի Հայաստանի ազգային հավաքականը պահպանել է 110-րդ տեղը:

*Մայիսի 4-ին Վազգեն Սարգսյանի անվան «Հանրապետական» մարզադաշտում կայացած ֆուտբոլի Հայաստանի գավաթի 2015/2016 թթ. խաղարկության եզրափակիչ խաղում հանդիպեցին Երեւանի «Բանանցն» ու «Միկան»: 2-0 հաշվով հաղթեց «Բանանցը» եւ պատմության մեջ երրորդ անգամ տիրացավ պատվավոր մրցանակին ու Եվրոպա լիգայի հաջորդ խաղարկությանը մասնակցելու իրավունք նվաճեց:

Պարտությունից հետո «Միկա» ֆուտբոլային ակումբի նախագահ Խորեն Հովհաննիսյանն ու գլխավոր մարզիչ Սերգեյ Յուրանը հրաժարական են տվել:

*Սպորտային մարմնամարզության Հայաստանի ազգային հավաքականը Ալբերտ Ազարյանի անվան մարմնամարզության մարզադպրոցում ստուգողական ուսումնամարզական հավաք է անցկացնում: Մեր մարմնամարզիկները նախապատրաստվում են Շվեյցարիայի Բեռն քաղաքում կայանալիք Եվրոպայի մեծահասակների եւ երիտասարդների առաջնությանը: Ազգային հավաքականը, որի կազմում են նաեւ օլիմպիական խաղերի ուղեգիր նվաճած Հարություն Մերդինյանն ու Արթուր Դավթյանը (նկարում), կմասնակցի ինչպես թիմային, այնպես էլ անհատական առաջնություններին:
*ՀԱՕԿ-ի նախագահ Գագիկ Ծառուկյանի անմիջական նախաձեռնությամբ եւ հովանավորությամբ հոկտեմբերի 10-ին Երեւանում կկանգնեցվի 1973 թ. ԽՍՀՄ չեմպիոն եւ գավաթակիր, լեգենդար «Արարատ» ֆուտբոլային թիմի հուշարձանը: Գագիկ Ծառուկյանը հաճախակի է հանդիպում «Արարատ 73»-ի ֆուտբոլիստների հետ: Անցած շաբաթ կայացավ հերթական հանդիպումը: Գագիկ Ծառուկյանը եւս մեկ անգամ վստահեցրեց, որ ինքը լինելու է արարատցիների կողքին ու անելու է հնարավորը, որ բան նրանց սրտով լինի:
* Հայաստանի 12 ըմբիշներ Թեհրանում մասնակցում են խուլերի աշխարհի առաջնությանը, որը կշարունակվի մինչեւ մայիսի 12-ը: 50 կգ քաշային կարգում Սենիկ Սերոբյանը նվաճել է չեմպիոնի կոչումը, իսկ Սամվել Հովհաննսիյանը՝ 55 կգ եւ Արարատ Սարգսյանը՝ 74 կգ, դարձել են բրոնզե մեդալակիր: