Հայ եկեղեցին մեծ շուքով տոնեց Համբարձման տոնը

Մեր Տեր և Փրկիչ Հիսուս Քրիստոսի Հրաշափառ Ս. Հարության քառասուներորդ օրը` մայիսի 5-ին, Հայաստանյաց Առաքելական Սուրբ Եկեղեցին մեծ
շուքով նշեց Համբարձման բերկրառատ տոնը, որի ընթացքում տոնախմբվում է նաև Ամենայն Հայոց Հայրապետական Աթոռի` 1441 թ.-ին
Սսից Սուրբ Էջմիածին փոխադրության պատմական հիշատակը: Տոնը Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի հայրապետական տնօրինությամբ հռչակվել է նաև իբրև Սուրբ Էջմիածնի ուխտի օր: Այս առիթով Մայր Աթոռ էին ժամանել հայաստանյան թեմերի առաջնորդները և բազում ուխտավորներ: Այս մասին «Արմենպրես»-ին տեղեկացրին Մայր Աթոռի տեղեկատվական համակարգից:

Տերունական օրվա կապակցությամբ Միածնաէջ Մայր Տաճարում, հանդիսապետությամբ Գարեգին Բ Ամենայն Հայոց Կաթողիկոսի, մատուցվեց Ս. և Անմահ Պատարագ: Պատարագիչն էր Հայաստանի Աստվածաշնչային ընկերության գլխավոր քարտուղար Գերաշնորհ Տ. Եզնիկ արքեպիսկոպոս Պետրոսյանը:
Իր քարոզում Սրբազան Հայրն արդրադարձավ Համբարձման տոնի պատգամին` նշելով. «Հարությունից քառասուն օրեր անց Քրիստոս հավաքեց իր աշակերտներին և բարձրացավ Ձիթենյաց լեռը` երկինք համբարձվելու և Հայր Աստծու աջ կողմը նստելու:Համբարձման տոնը, որ մենք տոնում ենք այսօր, մեզ ամեն տարի հիշեցնում է, որ պարտավոր ենք հետևել Քրիստոսի օրինակին, կատարել Աստծու բոլոր պատվիրանները, ապրել այնպիսի կյանքով, որպեսզի երբ ժամանակը գա, կարողանանք համբարձվել, բարձրանալ և նստել Աստծու աջ կողմում»:

Խոսելով Տիրոջ կողմից Համբարձման ժամանակ աշխակերտներին տրված պատվիրանի մասին. այն է` քարոզել փրկության Ավետարանը` Եզնիկ արքեպիսկոպոսը ներկայացրեց Հայաստանում Ս. Թադեոս և Ս. Բարդուղիմեոս առաքյալների կողմից իրականացրած քարոզչությունը և Հայոց Եկեղեցու հիմնադրումը:

«Ս. Թադեոս և Ս. Բարդուղիմեոս առաքյալները հաստատեցին Հայ Եկեղեցին, որով հայ ժողովٳրդը դարձավ Աստծու ընտրյալ նոր ժողովուրդը: Անշուշտ, մենք հասկանում ենք, որ բոլոր քրիստոնյաներն են Աստծու ժողովուրդ, սակայն ամեն մի Եկեղեցի` ազգային, թե տեղական, իր ամբողջության մեջ Աստծու Եկեղեցին է: Եվ այն վավերական եկեղեցի է այնքան ժամանակ, ինչքան որ ինքն իրեն զգում է Քրիստոսի համաշխարհային Եկեղեցու անբաժան մասնիկը: Եվ մեր ժողովուրդը երկու հազար տարի շարունակ ապրեց քրիստոնեական կյանքով և արժեքներով: Մեր ժողովուրդը միշտ հիշեց Համբարձման տոնը և զգաց, որ ինքը միշտ պետք է համբարձվի», – նշեց պատարագիչ Սրբազանը:

Այս կապակցությամբ Եզնիկ արքեպիսկոպոսը, անդրադարձ կատարելով վերջին օրերին Ադրբերջանի կողմից սանձազերծված ռազմական գործողություններին, խոսեց նաև հայրենյաց պաշտպանության համար իրենց կյանքն ընծայած զինվորների մասին: