Մոսկվայի հայտարարությունն ուղղված է Բաքվին. Գառնիկ Իսագուլյան

Ես կարծում եմ, որ Ռուսաստանի հայտարարությունը 99 տոկոսով ուղղված է Բաքվին:

Այս մասին newspress.am-ի հետ զրույցում ասաց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով ՌԴ նախագահի մամուլի քարտուղար Դմիտրի Պեսկովի այն հայտարարությանն ըստ որի՝ Մոսկվան ակնկալում է, որ Ղարաբաղյան հակամարտության կողմերը կխուսափեն այնպիսի քայլերից, որոնք կարող են խախտել բավական փխրուն հրադադարը:

«Այս հայտարարությունն ուղղված է Բաքվին, քանի որ վերջին շրջանում Ադրբեջանը ոչ միայն անցել է սադրիչ ու ռազմատենչ հռետորաբանության, այլ ապրիլի 1-ի լույս 2-ի գիշերը սանձազերծեց մարտական գործողություններ: Հայկական կողմը որևէ անգամ իրեն թույլ չի տվել նման սադրիչ հայտարարություն անել»,-ասաց Իսագուլյանը:

Ինչ վերաբերում է հարցին, որ Հայաստանն Արցախի հանրապետության ճանաչումը Մոսկվայի հետ չի համաձայնեցրել՝ ապա քաղաքագետը չի կարծում, թե Հայաստանի հանրապետությունը պետք է իր արտաքին ու ներքին քաղաքական քայլերը որևէ երկրի հետ համաձայնեցնի:

«Ցանկացած պետություն, հատկապես այն պետությունները, որոնք որևէ երկրի նկատմամբ ունեն հետաքրքրություններ, ցանկանում են, որ տվյալ երկրում գերիշխող դիրք և ազդեցություն ունենալ: Դա ելնում է այդ գերտերության սեփական շահերից: Բայց կարծում եմ, թե՛ ՀՀ-ը, թե՛ ԼՂՀ-ն անկախ պետություններ են և վարում են այնպիսի քաղաքականություն, որը բխում է հենց իրենց շահերից»,-նկատեց Իսագուլյանը:

Ինչ վերաբերում է Արցախի Հանրապետության ճանաչման գործընթացին, ապա, ըստ Իսագուլյանի, այս պահին քաղաքական առումով օրակարգային է և նպատակահարմար:

«Հայաստանի համար ԼՂՀ-ն դե ֆակտո և դե յուրե ըստ էության ճանաչված պետություն է՝ առանց միջազգային արենաներում թմբկահարելու: Չեմ կարծում, որ ՀՀ-ի համար այսօր Լեռնային Ղարաբաղի ճանաչումը գերխնդիր է: Ցանկացած էթնոքաղաքական կոնֆլիկտի ժամանակ կարևորագույն խնդիրը -ճանաչումն է այն պետությունների կողմից, որոնք ճանաչման գործում ընդդիմախոս են հանդիսանում թե իրավական, թե քաղաքական առումով»,-ընդգծեց քաղաքագետը: