Հերմինե Նաղդալյանը դավաճան չէ, այլ հակառակորդ, որին պետք է ոչնչացնել

ԱԺ փոխնախագահ Հերմինե Նաղդալյանը օրեր առաջ հայտարարել էր «մենք ձեր հողերը կամ այն հողերը, որոնց վրա մենք այսօր այդ իրավունքը չունենք, մենք այդ հողերը չենք ուզում»։

Newspress.am-ին ԼՂՀ նախկին պատգամավոր Վահան Բադասյանը ՀՀ ԱԺ փոխխոսնակի հայտարարության վերաբերյալ արձագանքեց, որ այդ քայլը դավաճանություն չի, քանի որ դավաճանը նա է, ով յուրային է, իսկ Հերմինե Նաղդալյանը ու իր նմանները եղել և մնում են հակառակորդներ:

Ըստ նրա, Հերմինե Նաղդալյանի նմանները, նաև նրանց տերերը հակառակորդ են իրենց պահվածքով և իրենց բարոյական կերպարով:

Վ. Բադասյանը շեշտեց, որ նման մարդիկ են շրջապատում նախագահին արդեն տասնյակ տարիներ և այդ մարդկանց շարանը մաս է կազմում իշխանական համակարգին. երեք նախագահներին էլ շրջապատել են:

Նման մարդիկ, ըստ նրա, դարձել են միլիոնատերեր և օգտվում են կոռուպցիոն համակարգից, նրանց գնահատական տալ պետք չէ, նրանք հակառակորդ են, իսկ հակառակորդներին պետք է ոչնչացնել՝ ոչ ֆիզիկապես. նրանց պետք է ճիշտ գնահատական տալ:

Նաև Վ. Բադասյանը հիշեցրեց, որ Հ. Նաղդալյանի այդ հայտարարությունից հետո Ադրբեջանի ամբողջ մամուլը ոգևորված է Հերմինե Նաղդալյանի հայտարարությամբ, արդարացնում էին իրենց զոհերին՝ ասելով, տեսեք Հայաստանում առաջացել է նման տրամադրություն, որ այդ հողերը պետք է հանձնվի:
Արցախում Վահան Բադասյանը հակառակորդներ չի տեսնում, այլ անտարբեր պաշտոնյաների մի մեծ խումբ, որոնք շրջապատել են Բակո Սահակյանին, որոնք աչք են փակում ամեն ինչի վրա, միայն իրենց տեղը տաք լինի, իսկ անտարբերությունից մինչև հակառակորդ լինելը մեկ քայլ է:

«Պարզապես պահը չի, անուններ չեմ ուզում տալ»,- ասաց ԼՂՀ նախկին պատգամավորը: