ՍԱՊԾ-ն օգնում է խեցգետնի արտահանման մոնոպոլիա ձևավորել

ՀՀ ԳՆ սննդամթերքի անվտանգության պետական ծառայության պետ Արմեն Հայրապետյանը օրերս շրջայց էր կատարել Արմավիրի, Արարատի և Գեղարքունիքի մարզերի խեցգետնի արտադրությամբ զբաղվող 11 ընկերություններում՝ մշտադիտարկման ընթացքին տեղում ծանոթանալու ու հնարավոր խախտումների ու թերացումների շտկմանն աջակցելու նպատակով: Այս մասին հաղորդագրություն էր տարածել ՍԱՊԾ-ն:

Այս այցելությունից հետո, այն ընկերությունները, որոնք զբաղվում էին խեցգետնի արտահանմամբ, հայտնվեցին ծանր վիճակում, թեև ՍԱՊԾ-ից նշում էին, որ տնտեսավարողներին ներկայացվել ՀՀ-ում, ԵՄ-ում և ԵԱՏՄ-ում գործող անասնաբուժական և անասնաբուժասանիտարական նորմերն ու պահանջները, սակայն արդյունքում պարզվեց, որ միայն ՍԱՊԾ-ն երկու ընկերության է որակի հավաստագրեր տրամադրում արտահանման համար:

Հիշեցնենք, որ նախօրեին Գեղարքունիքի մարզի Նորադուս համայնքի բնակիչները փակել էին միջպետական ավտոճանապարհը, իրենց դժգոհությունն էին հայտնում ՍԱՊԾ-ի գործելաոճից, որի թեթև ձեռքով խեցգետնի արտահանումը կենտրոնանում է մեկ-երկու ընկերությունների ձեռքում: Իսկ թե ինչ է անում ՍԱՊԾ-ն մշտադիտարկման և ԵԱՏՄ-ում գործող չափանիշների անվան տակ, պարզ է այնքանով, որ նորադուսցիները կարծում են, որ դաշտում մոնոպալիա են ցանկանում ստեղծել:

Նշենք, որ ՍԱՊԾ-ում խեցգետին արտահանողների ռեեստրում ներկայումս գրանցված 20 ընկերություն կա, սակայն միայն երկու ընկերություն է արտահանում:
Իսկ թե ինչպես կվարվի ՍԱՊԾ-ն խեցգետնի արտահանմամբ զբաղվող ընկերությունների հետ, դեռևս հայտնի չէ:

Ինչպես գիտենք Հայաստանը մոնոպոլիաների նկատմամբ հատուկ համակրանք ունի և եթե որևէ ոլորտ դեռևս մոնոպոլիա չունի, ապա արագորեն այդ սխալը ուղղվում է: Որպես կանոն, արտահանող ընկերությունները պատկանում են ոչ պատահական մարդկանց, այդ ոչ պատահական մարդիկ էլ թելադրում են խաղի կանոնները:

Ինչո՞ւ է խեցգետնի արտահանման շուրջ նման հետաքրքրությունը. վերջին տարիներին ավելացել է դեպի Ռուսաստան արտահանումը. պահանջարկն է մեծացել, արտահանումն ավելի հեշտացել է:

Այսինքն այս բիզնեսում կա խեցգետին, հեշտ արտահանման պայմաններ, պահանջարկ, էլ ի՞նչ է պետք բիզնեսով զբաղվողներին՝ չխանգարողներ ու մոնոպաոլիա, որն էլ Սննդի անվտանգության պետական ծառայության թեթև ձեռքով իրականացվում է: