Մեղավորները պետք է պատժվեն. վրացագետը՝ հայ և վրացի երիտասարդների բախման մասին

Վրաստանում ապրիլի 23-ին ավանդական ջահերով երթից հետո Ախալցխայի շրջանի Ծղալթբիլա, Աբաթխև և Ծինուբան հայկական գյուղերի երիտասարդներն իրենց ավանդության համաձայն բարձրացել են իրենց սրբավայրի մոտ կրակ վառելու և այսպիսով հարգելու Հայոց ցեղասպանության զոհերի հիշատակը: Հասնելով իրենց գյուղացիների կողմից կառուցված և իրենց իսկ գյուղի տարածքում գտնվող սրբավայր` հանդիպել են բազմաթիվ մարդկանց, որոնք խնջույք էին կազմակերպել և գտնվում էին ոչ սթափ վիճակում:

Նրանք հարևան Վալե քաղաքից էին և արդեն կես գիշերին ոստիկանությունն իրենց տներից հանել և ոստիկանություն է տարել բազմաթիվ երիտասարդների:
Հայ և վրացի երիտասարդների առճակատման վերաբերյալ վրացագետ Ալիկ Էրոյանցը newspress.am-ի հետ զրույցում նշեց, որ նման միջադեպեր են տեղի ունենում Ջավախքում և դա այդքան էլ զարմանալի չէ Վրաստանի դեպքում, քանի որ Վրաստանի իրավապահ համակարգում առկա թերությունները դեռևս չեն հասել ավարտական փուլին: Իսկ պատճառն այն է, որ դեռ նախկին իշխանությունների և մասնավորապես Սաակաշվիլիի կառավարման առաջին տարիներին սկսված իրավական բարեփոխումների գործընթացը մի շարք ուղղություններով արտաքուստ հաջողված լինելուն զուգահեռ, բազմաթիվ չերևացող սև կողմերով «զարդարվեց», իսկ այդ ամենի հեղինակը հենց Սաակաշվիլին էր՝ իր մի շարք թիմակիցների հետ միասին:

«Թերևս 2012թ.-ի խորհրդարանական ընտրություններից առաջ բացահայտված հայտնի «բանտային սկանդալը», մի շարք աղմկահարույց հանցագործությունների բացահայտման բացակայությունը, որոնցում ի դեպ, ըստ որոշ փաստերի, ներգրավված են եղել նախկին իշխանության բարձրաստիճան պաշտոնյաներ, այդ թվում՝ Սաակաշվիլին, դրա ակնառու ապացույցն է»,-ասաց Ա. Էրոյանցը:

Ըստ վրացագետի, նման դեպքերը վերացնելուն, բացառելուն ուղղված ներկայիս իշխանությունների ջանքերը, դեռևս իրենց նշանակալի արդյունքը չեն ունենում, քանի որ խնդիրը, կարծես, արմատացած լինի, իսկ այս դեպքում ոստիկանության համակարգում աշխատող և վերոնշյալ «սև գործերում» ներգրավված նախկին իրավապահներից շատերը դեռևս հանդիսանում են այդ համակարգի ծառայողը, և վերջիններին այնտեղից մաքրելու գործընթացը դեռ շարունակվում է:

Ինչ վերաբերում է կոնկրետ ապրիլի 23-24-ին տեղի ունեցած դեպքին, ապա, ըստ Ալիկ Էրոյանցի, այդտեղ այլ կարծիք չի կարող լինել, պետք է կատարվի խիստ քննություն, և մեղավոր ոստիկանները համապատասխան պատիժ պիտի կրեն, հատկապես, եթե հաստատվի խնդրի այսպես ասած բարոյական մասը: Թեև դա լիովին չի լուծի խնդիրը, սակայն, այդ ուղղությամբ լուրջ առաջընթացի հնարավորություն կնախանշվի:

«Անշուշտ, հայկական համայնքը, թե՛ հասարակական կազմակերպությունները և թե՛ակտիվ գործիչները, ինչպես նաև Վրաստանում գործող մարդու իրավունքների պաշտպանությամբ զբաղվող կազմակերպությունները, այդ թվում նաև այդ երկրի օմբուդսմենն անմիջական ներգրավվածություն պետք է ունենան տվյալ գործընթացին, որ պեսզի հնարավորինս օբյեկտիվ քննություն անցկացվի և արդյունքը լինի արդարացի»,-ասաց նա, հավելելով, որ վերոնշյալ խնդիրը վերջին 10-12 տարիների ընթացքում խորը արմատներ է գցել Վրաստանում, այդ ոլորտի հանդեպ անվստահությունը հասարակության շրջանում չի դադարում քննարկման առարկա լինել, բռնաճնշումները, որոնք կապվում են ոստիկանության համակարգի հետ, այդ զարհուրելի երևույթը, թերևս գլխավոր գործոններից մեկն էր, որի հետևանքով Սաակաշվիլիի իշխանությունը պարտություն կրեց 2012թ.-ի խորհրդարանական ընտրություններում:

Վրացագետը նաև հույս հայտնեց, որ գործող իշխանությունները նախորդների թողած վատ ժառանգությունը, նշված թերությունները հնարավորինս կմաքրեն իրավապահ համակարգից, այլապես առջևում սպասվող ընտրություններին իրենք ևս կարող են արժանանալ նախորդների ճակատագրին, այն է՝ հասարակությունը իր համակրանքը կարտահայտի այլ ուժերի նկատմամբ: