Արծրուն Հովհաննիսյանը հորդորում է դիրք վերցնելու կամ կորցնելու մասին չխոսել

Դիրքեր կորցնելու, դիրքեր վերցնելու հարցերը հնարավորինս քիչ քննարկեք, քանի որ դա կվնասի մեր զինվորներին ու մարտական գործողություններին:
Այդ մասին մամուլի ասուլիսի ժամանակ ասաց ՀՀ ՊՆ խոսնակ Արծրուն Հովհաննիսյանը՝ պատասխանելով լրագրողների հարցին, թե՞ արդյոք հայկական ուժերը Ղարաբաղում վերագրավել են ապրիլյան մարտերում կորցրած որոշ դիրքեր:

«Խնդիրը մեծ տարածքների մասին չէ, եթե ծառայել եք՝ գիտեք, դա դասակի կամ վաշտի հենակետից անգամ փոքր է: Այս տիպի մանր տարածքների վերցնելու կամ տալու հարցը, եթե շատ քննարկենք, հավատացած եղեք, որ զինվորականներին լրջորեն կխանգարենք իրենց գործը կատարել»,-ասաց Հովհաննիսյանը:
Նա նկատեց, որ անցած տարիների ընթացքում ՀՀ և ԼՂՀ զինված ուժերը իրենց դիրքային բարելավման հսկայական աշխատանք են տարել: Հովհաննիսյանի խոսքով՝ հիմա դա կլինի մի նոր ավելի լավ դիրք, նոր մանևր:

«Դիրքերի բարելավում է գնացել ամեն տարի: Եվ եթե դուք հիշում եք, մենք ընդհանրապես չենք բարձրաձայնել դրա մասին: Որովհետև երբ կա հակառակորդի հետ, այսպես կոչված՝ խրամատային անմիջական շփման պայման, յուրաքանչյուր նման քայլ՝ մի քիչ առաջ, մի քիչ հետ, մի քիչ ձախ, ամեն անգամ չի կարելի մեկնաբանել: Հետո, ի վերջո, էս պահին էդ զորքը կանգնած ինչ-որ բան է ուզում անել: Հիմա դուք ուզում եք, որ ինքը էդ ինչ-որ բանը չարած՝ պատմի՞ դրա մասին, արեց-պրծավ, միանգամից զեկուցի՞: Զորքը կաշխատի, ամեն ինչ կավարտվի, կգա իրավաբանական մի հատ ելակետի, էն ժամանակ շատ բան կներկայացվի ձեզ»,-պարզաբանեց ՊՆ մամուլի խոսնակը: