Հովիկ Աբրահամյանի շնորհակալությունը` օֆշորային սկանդալում հայտնված Միհրան Պողոսյանին

Կառավարության ղեկավար Հովիկ Աբրահամյանը անցյալ շաբաթվա վերջին ԴԱՀԿ աշխատակիցներին է ներկայացրել նորանշանակ պաշտոնակատար Արմեն Հարությունյանին և արդյունավետ աշխատանք մաղթել նրան:

Միաժամանակ նա համատեղ աշխատանքի և անցած տարիների ընթացքում Հարկադիր կատարման ծառայությունում իրականացված բարեփոխումների համար շնորհակալություն է հայտնել նախկին գլխավոր հարկադիր կատարող Միհրան Պողոսյանին:

Եվ ուշադրություն՝ Հովիկ Աբրահամյանը նշել է, որ ի դեմս ԴԱՀԿ ապահովող ծառայության՝ Հայաստանում այսօր գործում է կայացած գերատեսչություն, որն արդյունավետ իրականացնում է իր առջև դրված խնդիրները:

Եթե հաշվի առնենք, որ այս «կայացած գերատեսչությունը» որպես իր առջև ծառացած խնդիր տեսել է բնակչության միակ սեփականությունը ձեռքից վերցնելը, հաշվի չառնելով անգամ ազատամարտիկի, թե շարքայինի կարգավիճակը` ուրեմն կարելի է ասել, որ Միհրան Պողոսյանն իր գործը հաջողությամբ է պսակել. այսօր ազգաբնակչության գերակշռող մասը խնդիրներ ունի ԴԱՀԿ-ի հետ, արդարացի կամ անարդարացի:

Ինչ վերաբերում է Օֆշորային սկանդալին, ապա դա լրիվ առանձին պատմություն է, որը վերջնականապես խարանեց նախկին պաշտոնյային, մինչև իսկ այնքան, որ ինչպես newspress.am-ի հետ զրույցում ասաց քաղաքագետ Ստյոպա Սաֆարյանը, երկրի ղեկավարի հովանավորյալը, նույն ղեկավարի կողմից պարտադրաբար հեռացավ պաշտոնից:

Թեև իշխանական կուսակցությունը, իրեն հատուկ գործելաոճի համաձայն՝ «կրուտիտի քաղաքականությամբ», փորձում է հասարակությանը հրամցնել, թե այդ հրաժարականը, ոչ թե ամոթ, այլ հերոսություն էր:

Ու այստեղ խնդիրը, ոչ թե Միհրան Պողոսյանն է, այլ նրան իր «արդյունավետ աշխատանքի» համար շնորհակալություն ասողները:

Նույն սկզբունքով, կառավարության ղեկավարը պետք է շնորհակալություն հայտներ ԱԺ նախագահ Գալուստ Սահակյանին իր «կառուցողական արկեր» տերմինի նորամուծության համար: Ինչպես նաև ԱԺ փոխխոսնակ Էդուարդ Շարմազանովին, որ նա ոստիկանապետ Վովա Գասպարյանի փոխարեն ներողություն խնդրեց:

Այսպես կարելի է նաև շնորհակալություն հայտնել ԱԺ մյուս փոխխոսնակ Հերմինե Նաղդալյանին, ով իր լայն ու հպարտ ճակատով հայտարարում էր հողերի զիջման մասին:

Հովիկ Աբրահամյանը սահմանին ռուսական զենքից զոհված 92 զոհերի հուղարկավորության օրերին լայն ժպիտով ընդունեց ու շնորհակալություն հայտնեց ՌԴ վարչապետ Մեդվեդևին՝ Երևան այցելելու համար:

Այնպես որ, Հովիկ Աբրահամյանի շնորհակալությունների շարքը կարելի է անվերջ թվարկել: Շնորհակալություն՝ ավելի հաճախ չարված գործերի համար, որոնց պատճառով այսօր ունենք այն՝ ինչ ունենք:

Այստեղ տեղին է հիշել մի անեկդոտ, թե ինչպես մի 80-ամյա ծերունի շնորհակալություն է հայտնում հանրապետականներին իր խաղաղ ու ապահով մանկության համար: Լսողները զարմանում են.

-Բայց այն ժամանակ հանրապետականներ չեն եղել.

-Բա ես էլ հենց դրա համար եմ շնորհակալ,-ասում է ծերունին: