ՕԵԿ-ը իր մուրաբան հարամ արեց

«Մենք հնարավորություն չենք ունեցել կաշառք բաժանելու և երկրորդ ընդհանրապես, չենք բաժանել: Մենք միշտ ստացել ենք մեր վստահության քվեն», -այսօր Ազգային ժողովի ճեպազրույցներում հայտարարեց «Օրինաց երկիր/Հայկական վերածնունդ» խմբակցության քարտուղար Հովհաննես Մարգարյանը` մեկնաբանելով երեկ ԱԺ-ում պատգամավոր Նիկոլ Փաշինյանի հայտարարությունը, թե ընտրություններում մուրաբաներ ու պրոթեզներ բաժանողները խոսում են ընտրակեղծիքներից:

Նշենք, որ այնպիսի ընտրակաշառք ինչպիսին բաժանում էին ընտրությունների ժամանակ ՀՀԿ-ն և ԲՀԿ-ն, ոչ Դաշնակցությունն էր բաժանում, ոչ էլ Օրինաց երկիրը: ՀՀԿ-ական և ԲՀԿ-ական տաս հազար դրամներին հաջորդում էր Դաշնակցության հինգ հազար դրամները և Օրինաց երկրի մուրաբաները, օղու շշերը և պահածոները. յուրաքանչյուր ընտրակաշառք բաժանում էր ըստ իր գրպանի և նախասիրությունների:

Այնպես, որ այսօր չքմեղանալ, թե մենք ընտարկաշառք չենք բաժանել և չենք բաժանելու ուղղակի պետք չի ասել, քանի որ դեռևս ողջ են այն մարդիկ, ովքեր համակարգում էին այդ ամենը: Բարոյական կլիներ պարզապես այդ էջը ինչ-որ ձևով փակել ու չխոսել այդ մասին, քանի որ ինչպես մի շատ խելացի մարդ է ասում՝ շաքար ասելով բերանդ չի քաղցրանա:

Ինչ եղել եղել է. ընտրություններում բոլորն էլ կաշառք էին բաժանում, որովհետև բոլորն էլ բաժանում էին և ոչ ոք չէր ցանկանում հետ մնալ գործընթացներից. մեկը գրպանը լայն էր բացում, մյուս կիսաբաց էր անում:

Եթե մարդիկ իրենց տաս կամ հինգ հազարները անմիջապես ծախսեցին, ապա ՕԵԿ-ի մուրաբաները դեռևս երկար ժամանակ էր մնացել մարդկանց շուրթերին և հագեցվածության զգացողություն ապահովել. այնպես, որ ամենլավ ընտրկաշառքը ՕԵԿ-ինն էր, այն երկար պահպանվեց և քաղցր պահպանվեց, նաև քաղցր հիշողություններ է արթնացնում, իսկ այսօր ՕԵԿ-ը ի լուր աշխարհի հայտարարում է, որ այդ քաղցր զգացողությունները և հիշողություններն իզուր է. բա մարդիկ մեղք չե՞ն, նման անհոգի կատակնե՞ր են անում. խիղճ ունեցեք: Մարդ կա մի ամբողջ ամիս միայն ՕԵԿ-ական մուրաբա է կերել, հարամ արեցին: