Ինչ նախագիծ էլ ընդունվի, դասալիքներ միշտ կլինեն

Անկախությունից հետո բանակ զորակոչվելը ժամանակի ընթացքում որոշակի փոփոխությունների է ենթարկվել. նախ բանակ էին գնում բոլոր 18 տարեկանները, հետո ԲՈՒՀ-ի գործոնը սկսեց դեր խաղալ, այն ավարտելուց հետո էին մեկնում բանակ, հետո դարձյալ փոփոխության ենթարկվեց՝ անվճար համակարգից չէին մեկնում բանակ, նաև ասպիրանտները հնարավորություն ունեցան գիտական աշխատանքով զբաղվել և եթե մինչև 27 տարեկան այսպես որևէ գործում զբաղված էին լինում, ապա 27-ից հետո արդեն բանակ չէին զորակոչվում:

ԲՈՒՀ-ի անվճար համակարգից բանակ չմեկնելը դրաձավ ԲՈՒՀ-երում առքուվաճառքի առարկա: Տգետ, սակայն համապաստախան դրամագլուխ ունեցողները կարող էին քննության թերթիկների վրա ծաղիկներ ու աստղանիշեր նկարել և 20 բալով ընդունվել ԲՈՒՀ՝ զբաղեցնելով արժանավոր ուսանողների տեղը:  Տղաները նաև բանակ չէին գնում:

Հետո ասպիրանտուրա ընդունվելը դարձավ առուվաճառքի առարկա, երկրում սնկի նման սկսեցին աճել կիսագրագետ գիտության թեկնածուները, կամ այնպիսի անձինք, ովքեր խիստ զբաղված են կուսակցական 24 ժամյա աշխատանքով:

Իրադարձությունների նման զարգացումից հետո, ապրիլյան քառօրյա պատերազմը որոշակի հարցադրումներ վեր հանեց, նաև այն, որ զգալի քաղաքական և հասարակական գործիչներ բանակում չեն ծառայել և այսօր մեդալներ ու շքանաշաններ ունեն՝ չգիտես որ պատերազմում հաղթելու կամ մարտը շահելու համար: Ակտիվորեն շրջանառվում էր նաև այն, որ սահմանները հիմնականում պահում են սոցիալական ոչ բարվոք վիճակում գտնվող ընտանիքների զավակները:

Կառավարությունը այլ բան չկարողացավ մտածել, քան վերադառնալ ելման դիրք: Այն է՝ բոլոր 18 տարեկանները գրեթե անխտիր պետք է բանակում ծառայեն:

Մայիս ամսին նախատեսվում է, որ Հայաստանի խորհրդարանը կառավարությունից կստանա նախագիծ, որի համաձայն, 18 տարին լրացած բոլոր անձինք պետք է ծառայեն բանակում:

Նշենք, որ 18 տարին բոլորած բոլոր պատանիների բանակ ծառայելը միանշանակ չի ընդունվել:

Կան տարբեր մոտեցումներ: Կարծիքներ կան, որ պետք է հենց 18 տարին լրանալուց հետո ծառայել բանակում, կա նաև տեսակետ, որ ոչ բոլորը պետք է ծառայեն բանակում, չէ որ բանակ ծառայելուց բացի այլ անհրաժեշտ ոլորտներ կան, որտեղ ևս ոչ պակաս ներուժ է հարկավոր: Եվ պետք է բոլորին զորակոչեն բոլոր 18 տարեկաններին լայնամասշտաբ պատերազմի դեպքում:

Ինչ տարբերակ էլ լինի, յուրաքանչյուր ոք, ով ցանկանում է, որ տղան ծառայի Հայոց բանակում՝ կծառայի, ով կդիմի տարբեր միջոցների, որ տղան խուսափի ծառայությունց, դա կարվի և գործող օրենքի, և առաջարկվող նախագծի պայմաններում: