Ինչո՞ւ Նաիրա Զոհրաբյանը կոշտ չպատասխանեց Հերմինե Նաղդալյանին

Զարուհի Փոստանջյանը տեղից ոչ կոռեկտ, չփաստարկված հայտարարություններ է արել, ինչին ի պատասխան հանրապետականները տվել են համարժեք պատասխան: Այս մասին այսօր՝ ապրիլի 29-ին, Newspress.am-ի հետ զրույցում ասաց ԲՀԿ խմբակցության ղեկավար Նաիրա Զոհրաբյանը:

«Այն ինչ երեկ տեղի ունեցավ խորհրդարանում, իհարկե, էթիկայի նորմերից դուրս էր, բայց չմոռանանք, որ տիկին Փոստանջյանը, քանի որ միկրոֆոնով չէր բղավում, տեղից բարձրաձայնում էր այնպիսի հայտարարություններ, որոնք անհիմն էին եւ դուրս էին կոռեկտության սահմաններից: Եւ բնականաբար, Հանրապետականների կողմից հնչեցին բարձրաձայնվող հայտարարություններ, որոնք ես ինձ թույլ չեմ տա կրկնել, համարժեք պատասխաններ»,- նշեց Զոհրաբյանը:

Նրա խոսքով՝ Զարուհի Փոստանջյանն իրավունք չուներ շահարկելու զոհված զինծառայողների անունները եւ ծառայեցնելու դա իր քաղաքական շահերին:

«Ես տիկին Փոստանջյանին հարգում եմ որպես սկզբունքային քաղաքական գործիչ, բայց մի սահման կա, որ մեզնից որեւէ մեկն իրավունք չունի անցնելու: Մենք պետք է հասկանանք, որ տասնութ-տասնինը տարեկան երեխաներ են զոհվել, եւ անընդհատ տարբեր կոնտեքստներում, ամեն մեկն իր քաղաքական, կուսակցական կամ անձնական շահերի համար երեխաների անունը չպետք է շահարկի: Եթե ինչ-որ բանով չենք կարող օգնել նրանց ընտանիքներին, չենք կարող նրանց վիշտը մեղմել, որովետեւ դա անմեղմելի է, պետք է գոնե չփորձենք անմեղ երեխաների թափած արյունը դարձնել քաղաքական շահարկման առարկա»,- ասաց Նաիրա Զոհրաբյանը:

Թե ինչու քաղաքական գործիչները նույնքան կոշտ չպատասխանեցին ԱԺ փոծխնախագահ Հերմինե Նաղդալյանի հայտարարությանը Նաիրա Զոհրաբյանը պատասխանեց.
«Հերմինե Նաղդալյանն իր հայտարարության հետ կապված ամեն ինչ ասել է, ավելացնելու ոչինչ չունեմ»: