ԼՂՀ հարցի շուրջ բանակցային գործընթացի վերսկսման համար անհրաժեշտ է երեք կարևոր քայլ

ՀՀԿ ԳՄ նիստում Նախագահ Սերժ Սարգսյանը նշել է, որ Լեռնային Ղարաբաղի հիմնահարցի շուրջ բանակցային գործընթացի վերսկսման համար անհրաժեշտ է   երեք կարևոր քայլ՝ վստահության հետաքննության մեխանիզմների ներդրում, հասցեական հայտարարություններ և երաշխիքներ, որ Ադրբեջանը չի գնա նոր ագրեսիայի և ահաբեկչության Լեռնային Ղարաբաղի ժողովրդի նկատմամբ: Այս մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը:

«Այս պահին բանակցությունների վերսկսման մասին խոսելը վաղ է, որովհետև, երբ գնում են մարտական գործողություններ կամ գոնե դրանք ամբողջովին չեն ավարտվել, երբ Ադրբեջանը խախտում է 1994թ-ի հրադադարի պայմանագիրը, որը ստորագրել է Արցախի ու Հայաստանի հետ, նաև խախտում է Մոսկվայում ձեռք բերված բանավոր պայմանավորվածությունը կրակի դադարեցման մասին»,-ասաց Շարմազանովը:
Նրա խոսքով` Հայաստանը եղել ու մնում է ԼՂՀ ժողովրդի անվտանգության երաշխավորը, խնդիրը պետք է լուծվի այդ ժողովրդի ինքնորոշման իրավունքի իրացման պայմաններում և առանց պաշտոնական Ստեփանակերտի որևէ մեկը չի կարող հասնել հարցի ամբողջական լուծման:

«Մենք խնդրի բացառապես խաղաղ ճանապարհով լուծման կողմնակից ենք, բայց  որպեսզի վերսկսենք բանակցություններն, անհրաժեշտ են վստահության միջոցառումներ, հասցեական գնահատականներ, երաշխիքներ միջազգային հանրության կողմից: Մեր նպատակը նախ և առաջ ոչ թե միակողմանի ճանաչումն է, այլ միջազգային ճանաչումը: Ուշ թե շուտ դա լինելու է: Լեռնային Ղարաբաղի ժողովրդի միակ ապագան է՝ լինել դեյուրե ճանաչված ԼՂՀ քաղաքացիներ»,-ասաց նա:

Հայաստանի կողմից Արցախի անկախության ճանաչման հավանականության մասին հարցին Շարմազանովը պատասխանել է. «Կգա ժամանակը, կասենք։ Այս պահին կարող եմ ասել, որ մենք խնդրի բացառապես խաղաղ կարգավորման կողմնակիցն ենք։ Ուզի Ադրբեջանը, չուզի, ուզի Թուրքիան, թե չուզի, պայքարը ԼՂ ժողովուրդը սկսել է անկախության համար, և Հայաստանը սատարելու է նրանց արդար պահանջին»։