Հայացքը սահամանամերձ գյուղերին, փողը` գրպանում

Այսօր կառավարության հերթական նիստի ժամանակ որոշում է կայացվել մոտ 9 մլն դրամ հատկացնել դեռեւս 2015թ-ի ամռանը արկակոծման ենթարկված սահմանամերձ Կոթի գյուղի բնակիչներին՝ որպես փոխհատուցում: Սա այն դեպքում, երբ վնասի չափերն իրականում գնահատվել են 11 մլն 935,5 հազ. դրամ, երբ ամեն օր խոսվում է հայացքն ու միջոցները սահմանամերձ գյուղերին ուղղելու, դրանց բնակիչներին արտոնություններ տալու մասին:

Խոսվելը խոսվում է, բայց գործի այդպես էլ չի վերածվում, քանզի նույն Կոթիի բնակիչներն ամիսներ շարունակ ստիպված են լինում սպասել՝ բաղձալի փոխհատուցմանն արժանանալու համար: Հատկացումից հետո էլ գյուղապետի մղաձավանջներն են ավելանում՝ ում և ինչքան փոխհատուցել՝ որպեսզի և արդար լինի, և վնասն ամբողջությամբ փոխհատուցվի:

Եվ այս ամենը՝ պաշտոնական գործուղումներին հատկացվող գումարների ավելացման, բարձրաստիճան պաշտոնյաների և նրանց օգնականուհիների՝ առաջին դասով թռիչքների ու հինգաստղանի հյուրանոցներով ապահովման ֆոնին:

Թե հատկացված 9 մլն դրամով 11մլն 935,5 հազ. դրամ վնասի քանի տոկոսը եւ բնակիչներից քանիսը կփոխհատուցվեն, ցույց կտա ժամանակը: Կոթիի գյուղապետ Ֆելիքս Մելիքյանը համոզված է, որ փոխհատուցումը կբավականացնի բոլորին:

«Վնասվել են հիմնականում գարու եւ ցորենի ցանքատարածությունները՝ մոտ 27,5 հա: Մինչ այժմ փոխհատուցում ստացել է 22 ընտանիք, առաջիակայում մի քանի ընտանիք եւս կփոխհատուցվի: Բոլորին էլ կհերիքի»,- Newspress.am-ի հետ զրույցում ասաց Կոթիի գյուղապետ Ֆելիքս Մելիքյանը:
Թերևս կասկածելի է՝ կառավարության կողմից հատկացվելիք այդ գումարը, որը շատ չինովնիկներ կազինոներում ընդհամենը մեկ օրվա ընթացքում են վատնում, արդյոք լիովին բավարար է բնակիչների կրած վնասները փոխհատուցելու համար: Թե սա պարզապես բնակիչներին լռեցնելու ևս մեկ քայլ է: