Շարմազանովն ԱԺ իր «խրամատից հակահարձակ» եղավ

ԱԺ փոխնախագահ Էդուարդ Շարմազանովն այսօր առաջինն էր, որ հետևեց նախագահ Սարգսյանի հորոդորին ու Ազգային ժողովի իր «խրամատից հակահարձակ» եղավ ընդդիմադիր պատգամավորի ղարաբաղա-ադրբեջանական հարցի շուրջ քննադատությանը:

Հիշեցնենք, որ երեկ երեկոյան Սերժ Սարգսյանը հանդիպել է իր կուսակիցներին և խիստ հրահանգել նրանց արժանի պատասխան տալ հակամարտությանը վերաբերող քննադատություններին: Նա մասնավորապես ասել էր, թե «իմացեք, որ սա էլ ձեր խրամատն է և ձեր դիրքերն են, և դուք էլ ձեր տեղում պետք է լավ պայքարեք»:

Ուստի պատահական չէր, որ Շարմազանովի նյարդերը տեղի տվեցին, երբ ԱԺ «Ժառանգություն» խմբակցության պատգամավոր Զարուհի Փոստանջյանն ասաց, թե Ընտրական օրենսգծով Հայաստանը 13 ընտրատարածքների պետք է կիսեն, որպեսզի դրա միջոցով փորձեն օգնել Սերժ Սարգսյանին վաճառել Հայաստանի և Արցախի անկախությունը, վաճառել հայ ժողովրդի անվտանգությունը, որպեսզի պահպանեն իշխանությունը»:

«Եթե այդպես չլիներ, մենք կունենայինք համապատասխան սպառազինություն»,-ասաց Փոստանջյանը:

Հենց այստեղ էլ Է.Շարմազանովը դուրս եկավ հունից և ջղաձիգ տոնով հորդորեց խոսել միայն թեմայի շուրջ:

«Տիկին Փոստանջյան, դուք այստեղ արտոնյալ չեք, հարգելիս, խոսեք օրինագծից: Եվ հետո, ապրիլյան քառօրյա պատերազմի ընթացքում մեր ինքնապաշտպանական ուժերը գերագույն գլխավոր հրամանատար Սերժ Սարգսյանի գլխավորությամբ, հասել են հաջողության: Կանխվել է Ադրբեջանի հարձակումը: Ադրբեջանը պարտվել ա, դուք ստեղ ի՞նչ եք բողոքում: Մեզնից եք պաշտպանում Ղարաբաղը՞, չի կարելի այդպես: Չի կարելի»,-չէր հանգստանում Շարմազանովը:

Շարմազանովին միացան նաև մյուս «դիրքապահ հանրապետականները»: Իսկ Խոսրով Հարությունյանն էլ փորձեց «հերոսանալ»: Նա ասաց, որ եթե Փոստանջյանը նույն ելույթն ունենար Ադրբեջանի Միլի Մեջլիսում՝ ծափահարությունների կարժանանար:

«Դուք հնչեցնում եք թեզեր, որոնք ուղղակի սպասելի են ադրբեջանական քարոզչամեքենայի համար: Եվ ավելին՝ այն, ինչ ասում եք, որևէ աղերս չունի իրականության հետ», -ձեռքը թափ տալով ասաց Հարությունյանը:

Երբ Փոստանջյանը փորձեց տեղից ռեպլիկներ հնչեցնել Շարմազանովն իր թիմակից ընկրոջը օգնության հասավ՝ նախատելով Փոստանջյանին:

«Տիկին Փոստանջյան, հըլը մի վարյկյան, բարի եղեք, կուլտուրա ունեցեք, էթիկա, լսեք Խոսրով Հարությունյանին»,-ասաց Շարմազանովը: