Նոր ԸՕ-ն կմեծացնի ընտրական համակարգի հանդեպ զրոյական վստահությունը. դաշնակցական

Նոր ընտրական օրենսգիրքը մեծացնելու է ընտրական համակարգի հանդեպ հանրության զրոյական վստահությունը: Այդ մասին այսօր՝ ապրիլի 28-ին Ազգային ժողովում Ընտրական օրենսգրքի նախագծի քննարկման ժամանակ ասել է ԱԺ Դաշնակցություն խմբակցության քարտուղար Աղվան Վարդանյանը:

«Կա հանրահայտ ճշմարտություն՝ լավ ընտրություններ կարելի է անցկացնել վատ օրենքով և ամենալավ օրենքով էլ կարելի է անցկացնել խայտառակ ընտրություններ», -ասել է պատգամավորը:

Ճիշտ է, նոր Ընտրական օրենսգրքի նախագծում Դաշնակցություն կուսակցության ոչ բոլոր առաջարկություններն են ընդունվել, սակայն Աղվան Վարդանյանի խոսքով՝ «աշխատելու տարբերակն ավելի արդյունավետ է, քան վերջնագրեր ներկայացնելը կամ մերժողական կեցվածք ընդունելը»:

Աղվան Վարդանյանի խոսքով՝ Հայաստանի ընտրական գործընթացում Դաշնակցությանը շարունակում է մտահոգել երկու մեծ խնդիր՝ վարչական ռեսուրսի անսահմանափակ կիրառումն ու ընտրակաշառքը, որոնց լուծումը նոր որակի իշխանություն ձեւավորելու հնարավորություն կտան:

«Դաշնակցության անունից առաջարկում եմ՝ 2017 թվականի խորհրդարանական ընտրությունների քարոզարշավից առաջ մասնակից բոլոր քաղաքական ուժերը ստորագրեն ջենթլմենական համաձայնագիր, որի համաձայն, ո՛չ իրենք և ո՛չ էլ իրենց տարածքային կառույցները ընտրակաշառք չեն բաժանելու: Կարծում եմ, սա կլինի պատասխանատու և համարժեք դիրքորոշում երկրի դիմագրաված մարտահրավերներին, նոր որակի իշխանություն ձևավորելու նախապայման»,- ասել է պատգամավորը: