Նախագահը պատգամավորներին ցույց է տալիս իրենց «խրամատի և դիրքերի» տեղը

Երեկ երեկոյան Սերժ Սարգսյանը հանդիպել է իր կուսակիցներին և հանդիմանել նրանց աշխատանքի բացթողումների մեջ:

Լրագրողների հետ զրույցում այդ մասին ասել է ԱԺ ՀՀԿ խմբակցության պատգամավոր Վազգեն Կարախանյանը:

Փոխանցելով նախագահ Սարգսյանի խոսքերը՝ պատգամավորը հայտնել է, որ նախագահը հանդիմանել է պատգամավորներին՝ թե «ձեր աշխատավայրը ԱԺ-ում է, և ձեզ դրա համար աշխատավարձ են տալիս: Եթե մարդիկ չեն կարողանում իրենց տեղում իրենց աշխատանքը կատարել, նրանք տեղ չունեն մեր պաշտոնական դիրքերում»:

Սերժ Սարգսյանին մասնավորապես վրդովեցրել է այն, որ հանրապետականները չեն կարողանում արժանի պատասխանել ղարաբաղա-ադրբեջանական խնդրի շուրջ հնչող քննադատություններին և արձագանքել հայտարարություններին, թե այդ ժամանակ կազմակերպչական ու այլ աշխատանքի թերություններ են եղել:

Ուշագրավ է նաև այն, որ Կարախանյանի փոխանցմամբ՝ նախագահն ասել է, թե «իմացեք, որ սա էլ ձեր խրամատն է և ձեր դիրքերն են, և դուք էլ ձեր տեղում պետք է լավ պայքարեք»:

Հետաքրիքր է այն, թե երբ նախագահը պատգամավորներին ցույց էր տալիս իրենց «խրամատի և դիրքերի» տեղը և հորդորում նրանց «իրենց տեղում լավ պայքարեն», ի՞նչ նկատի ուներ և ո՞ւմ էր նա որպես թշնամի տեսնում, ո՞ւմ դեմ պետք է պայքարեն հանրապետականները և ովքե՞ր կլինեն զոհերն այս սահմանին: Սահման, որը գծել է իշխող հանրապետական կուսակցությունը՝ պատնեշ դնելով իր և իր ժողովրդի միջև:

Եթե Աժ-ն խրամատն է, ապա որտե՞ղ են մեր զինվոր տղերքը: