Բիզնես դասում որեւէ նախարարի տեսա նստած, հրապարակային բարձրաձայնելու եմ. Նաիրա Զոհրաբյան

Բացարձակ աննպատակ եւ անընդունելի է ցոփ ու շվայտ նախարարների բիզնես դասով թռչելն ու թանկարժեք հյուրանոցներում տեղավորվելը՝ հատկապես այն դեպքում, երբ մենք գտնվում ենք պատերազմական իրավիճակում: Այս մասին այսօր՝ ապրիլի 28-ին Newspress.am-ի հետ զրույցում ասաց ԲՀԿ պատգամավոր Նաիրա Զոհրաբյանը՝ անդրադառնալով մամուլում հայտնված այն հրապարակումներին, որ կառավարությունն այս տարի 8 մլն-ով ավելացրել է պաշտոնական գործուղումների համար նախատեսված ավիատոմսերի ծախսերը՝ դրանք հասցնելով 20 մլն դրամի:

«Ես ինքս մտել եմ ինքնաթիռ, իմ գործընկերների հետ գնացել եմ էկոնոմ դասում նստելու, եւ տեսել եմ, որ առաջին դասում նստած են տարբեր նախարարությունների վարչության պետեր, եւ կներեք, բոլոր նախարարների օգնականուհիներ: Սա բացարձակ անթույլատրելի է: Սահմանադրությամբ պատգամավորի կարգավիճակը շատ ավելի բարձր է, քան նախարարինը, հատկապես հանձնաժողովի նախագահի կարգավիճակը: Ես հանձնաժողովի նախագահ եմ, 9 տարվա պատգամավոր եմ, բայց որեւէ անգամ ինձ թույլ չեմ տվել առաջին կարգի չվերթներից օգտվել, կամ հինգաստղանի հյուրանոցում մնալ»,- նշեց Զոհրաբյանը:

Նրա խոսքով՝ ակնհայտ է, որ նախարարներն իրենց գրպանից չեն վճարում բիզնես դասով թռչելու ծախսերը, այլ դա անում են պետական բյուջեից: Մինչդեռ վարչապետը բազմիցս բարձրաձայնել է ծախսերը կրճատելու եւ պաշտպանության բանակին ուղղելու մասին:

«Հարց է առաջանում, նախարարը իմ՝ որպես հանձնաժողովի նախագահից շատ ավելի քիչ աշխատավարձ է ստանում, այդ ինչպես է ինքն իր գրպանից բիզնես կլասի տոմս առնում: Պարզ է՝ դա արվում է պետբյուջեից: Եվ այսուհետ, ես որեւէ նախարարի տեսա բիզնես դասում նստած՝ իր օգնականուհիների հետ, այդ մասին հրապարակային բարձրաձայնելու եմ: Մենք գտնվում ենք պատերազմական իրավիճակում, եւ բոլորը պետք է ձգեն ամրագոտիները»,- ասաց նա:

ԱԺ ՀԱԿ խմբակցության քարտուղար, պատգամավոր Արամ Մանուկյանի խոսքով՝ պաշտոնական գործուղումների ծախսերի ավելացումը կառավարության կողմից կատարվող անիմաստ ծախսերի մի փոքր մասն է միայն:

«Նայեք վարկերը, պետական պարտքերը, եւ կտեսնեք, որ դա իրենից ներկայացնում է անիմաստ, աննորմալ, աննպատակ ծախս: Հայաստանն այսօր 6 մլրդ դոլար պարտք ունի, դա նշանակում է, որ ՀՀ սեփականության համախառն ներքին արդյունքի ամբողջ ունեցվածքի ուղիղ կեսը մենք պարտք ենք»,- նշեց պատգամավորը: