Հերմինե Նաղդալյանն ու իր գործընկերները սկսել են «կրուտիտլարի» քաղաքականությունը

Ապրիլի 26-ին ԼՂՀ ԱԺ փոխնախագահ Հերմինե Նաղդալյանը լրագրողների հետ զրույցի ժամանակ հայտարարել էր, որ ՀՀ-ն Ղարաբաղի հարցում պատրաստ է գնալ տարածքային փոխզիջման:

Նա մասնավորապես նշել էր. «Մեր փոխզիջումը 5 գրավյալ տարածքները չեն, այլ Մադրիդյան սկզբունքները, որտեղ մենք ներկայացնում ենք որպես մեր խաղաղ, ինքնիշխան պետության համար պայքարող ժողովուրդ: Մենք ոչ թե պայքարում ենք ադրբեջանական հողերի, այլ մեր խաղաղ ինքնիշխան պետության համար: Դրա համար մենք ընդունում ենք, որ երբ որ կլինի հանրաքվեն եւ կընդունվի կարգավիճակի մասին որոշում եւ աշխարհը կընդունի Ղարաբաղի անկախությունը, մենք չենք ուզի այն հողերը, որոնց վրա այսօր այդ իրավունքը չունենք: Սա մեր բուֆերային զոնան է եւ սա մեր անվտանգության երաշխիքն է»:

Անդրադառնալով Հերմինե Նաղդալյանի այս հայտարարությանը ԼՂՀ ԱԺ խմբակցությունների պատգամավորները այն պարզապես անբարոյականություն և հայրենիքի դավաճանություն են համարել: Նրանք նշել են, որ սա ադրբեջանական շահերը սպասարկող հայտարարություն էր: Իսկ նման մանկամիտ և անլուրջ հայտարարությունները պարզապես անթույլատրելի են, քանի որ դրանք կարող են լուրջ սպառնալիք դառնալ մեզ համար: Ու չնայած ԼՂՀ ԱԺ պատգամավորների նաև քաղաքական այլ գործիչների հայտարարությունները հեղեղել են ողջ լրատվական դաշտը, սակայն չգիտես ինչու հանրապետական խմբակցության պատգամավոր Հովհաննես Սահակյանը տեղյակ չէ դրանից: Այս մասին նա ասաց Newspress.am-ի հետ զրույցում:

«Ես տեղյակ չեմ, թե ինչ հայտարարություններ են արել Արցախի մեր գործընկերները: Սակայն վստահ եմ, որ տիկին Նաղդալյանը այդ հայտարարությունը այլ կոնտեքստում է ասել: Պարզապես հայտարարության իմաստն է սխալ ընկալվել»,- ասաց Հովհաննես Սահակյանը:

Սահակյանը մեզ հորդորեց նաև կապ հաստատել Հերմինե Նաղդալյանի հետ և ավելի հանգամանալից ստանալ բոլոր հարցերի պատասխանները: Սակայն Հերմինե Նաղդալյանի հետ կապ հաստատելու անհրաժեշտություն չկա, քանի որ նա արդեն արել է իր հայտարարությունը, որը բառ առ բառ տեղ է գտել լրատվամիջոցներում: Եվ հնարավոր չէ, որ բոլոր լրատվամիջոցները սխալ մեկնաբանություն տային այդ հայտարարությանը կամ ինչպես Հերմինե Նաղդալյանն էր ասել. «լրագրողական սխալ սղագրության պատճառ» լիներ: Պարզապես Հերմինե Նաղդալյան ու իր գործընկերները անցել են «կրուտիտլարի» քաղաքականությանը: