Անբարոյականություն է, որ զինվորի ընտանիքը կոմունալ վճարման խնդիր ունի

Կառավարության նիստի սկզբին Աշխատանքի և սոցիալական հարցերի նախարար Արտեմ Ասատրյանը ներկայացրեց ապրիլի 1-ից 5-ը ղարաբաղա-ադրբեջանական հակամարտ զորքերի շփման գծում մարտերի հետևանքով զոհված զինծառայողների ընտանիքներին աջակցություն ցուցաբերելու ծրագիրը:

Նախարարը տեղեկացրեց, որ ուսումնասիրել են 64 զոհված զինծառայողների ընտանիքների սոցիալական վիճակը: Պարզվել է, որ որոշ ընտանիքներ ունեն առողջական խնդիր, բժշկական օգնության անհրաժեշտություն, որոշները` վիրահատության և հոգեբանական ծառայության կարիք: Մի մասն ունի վարկային պարտավորություն, որոշները` կոմունալ վճարումներ: Այդ ընտանիքներից տասում կա 17 անչափահաս երեխա, ընտանիքներից 15-ն ունեն ուսանողներ, որոշները վարկային պարտավորություններ, իսկ 3 ընտանիք ունի այս պահին ժամկետային ծառայության մեջ գտնվող երեխա:

Վերջերս, երբ Սեյրան Օհանյանին հարցրել էին, թե այդ ինչպես է լինում, որ առաջնագծում միայն անապահով ընտանիքների երեխաներն են, արդյոք կոռուպցիայի դրսևորում չէ, նախարարն պատասխանել էր. «Այնքան էլ չի համապատասխանում իրականությանը: Կան օբյեկտիվ հանգամանքներ, որ մենք պետք է պարզաբանենք՝ հասարակությունն իմանա հետևյալը. ովքեր են կարողանում այսօր բարձրագույն կրթություն ստանալ, գիտական թեզեր ունենալ, ստանալ տարկետում, ասպիրանտուրա ընդունվել: Այդ իրականության մեջ, կարծում եմ, հիմնականում միջին և բարձր խավերի ընտանիքներից են, որ ընդունվում են բուհեր, նրանց մեծ մասը հետագայում լրացնում են սերժանտական կազմը, այս կամ այն մասնագիտությունները, որոնք առաջնահերթ նշանակություն ունեն զինված ուժերում»:

Նախարարի ասածը պարզապես ցանկալին իրականության փոխարեն ներկայացնելն է, և առաջնագիծը պահողների ընտանիքներին վիրավորելը: Այլ հարց է, որ սոցիալապես վատ վիճակում ապրող ընտանիքների երեխաները սահման պահելուց հետո, ուսումն ավարտելուց հետո աշխատանք չեն գտնում ու արտագնա աշխատանքի են մեկնում: Առաջնագիծ պահող տղաները կամ պետք է հանրապետականացվեն, կամ մնան անգործ՝ սա է մեխանիզմը: Եվ ամոթ է ու անբարոյականություն, որ այսօր առաջնագիծը պահող ընտանիքները կոմունալ վճարումներ անելու խնդիր ունեն, դա նշանակում է, որ թիկունքում պետություն չկա, պետությունը այդ ընտանիքները թալանածների թիկունքում է: Այլապես Սոցապ նախարարությունը պետք է ավելի արդյունավետ աշխատանք տաներ՝ բոլոր զինկոմիսարիատներից ստանար առաջնագիծը պահող զինվորների ընտանիքների հասցեները և առաջարկեր պետական հատուկ ծրագիր՝ ուղղված այդ ընտանիքներին, որպեսզի այս ամոթը չկրկնվի՝ ընտանիքում զինվոր է զոհվել, իսկ այդ ընտանիքը կտուր չունի, վարկ ունի,կոմունալ վճարում անելու խնդիր ունի: Ավելին սոցապ նախարաը այս պատկերն ներկայացնելիս նաև վարչապետին կհուշի, որ անօրինական թալանածը հետ վերադարձնելու ճիշտ ժամանակն է: