«Նաիրիտի» աշխատանքային խմբի ստեղծումը ձևական էր. նաիրիտցի

Այսօր` ապրիլի 28-ին, կառավարության հերթական նիստի օրը իրենց խնդիրներով կառավարության շենքի մոտ էին հավաքվել «Նաիրիտ» գործարանի աշխատակիցները: Այս պահին 200 նախկին նաիրիտցի բողոքի ակցիա են կազմակերպել` գործարանը վերագործարկելու պահանջով: Օրերս աշխատանիքից ազատվելու ծանուցում են ստացել ևս 500 նաիրիտցի:

«Նաիրիտի» աշխատանքային խմբի անդամ Կարինե  Շահվերդյանը newspress.am-ի հետ զրույցում նկատեց, որ արդեն վերագործարկման հույս չկա:

«Մեզ ասում են գնացեք, ամեն ինչ լավ կլինի, սակայն ծանուցում են ուղարկում թե ազատված եք գործից: Սա ի՞նչ է նշանակում: Հույս չկա այլևս գործարանը վերագործարկելու»,-հավելեց նա:

Նաիրիտցիներին վրդովեցրել է նաև ՀՀ էկոնոմիկայի նախարար Արծվիկ Մինասյանի անտարբերությունը, ով ոչ մի առիթով «Նաիրիտի» խնդրով հանդես չի եկել:

«Մենք տեղյակ ենք, որ նա երեկ երեկոյան ժամը  7-ի կողմը գնացել է գործարան, բայց ինչ նպատակով է գնացել` որևէ հրապարակում այդ մասին չեղավ ոչ հեռուստատեսությամբ, ոչ էլ մամուլում: Ինչո՞ւ են այդ մասին գաղտնի պահում»,- հայտնեցին նրանք:

«Նաիրիտի» աշխատանքային խմբի մեկ այլ անդամ Արմեն Դեմիրճյանն էլ նկատեց, որ համակարգող խմբի ստեղծումը ձևական էր, որովհետև այդպես էլ խմբի բոլոր անդամների հետ էլ հանդիպում չեղավ:

«Ապրիլի 1-ին նախատեսված էր, որ հայկական կողմը ռուս ներդրողին ներկայացներ իր առաջարկները, մինչ այդ պետք է լսեին  նաև մեր առաջարկները, սակայն այդպես էլ ընդհանուր հանդիպում չեղավ համակարգող խմբի անդամների և պատկան մարմինների հետ: Եվ այդպես էլ չլսեցին մեր առաջարկները: Ենթադրում եմ, որ առանց մեզ էլ որոշում են կայացրել»,- ասաց Դեմիրճյանը:

Նրա խոսքով` այսօր, երբ գտնվում ենք պատերազմական վիճակում, Նաիրիտի գործարկումը առավել քան անհրաժեշտ է:

«Ամբողջ աշխարհում կա 4-5 տեղ, որտեղ կաուչուկ են արտադրում ու մերը լավագույնների շարքում: Չեմ հասկանում, դրսից չեն թողնում, որ գործարկեն Նաիրիտը, թե մեր վերադասները չեն ուզում»,- նկատեց զրուցակիցը: